O obxectivo é facilitar o seu uso en diferentes contextos: desde quen necesitan unha opción rápida e sinxela, ata quen requiren traballar sen conexión, colaborar na nube ou integrar eXe en plataformas como Moodle, WordPress ou Omeka-S.
A infografía “Guía rápida: elixe a túa versión de eXeLearning” resume estas posibilidades e axuda a escoller a modalidade máis adecuada segundo as necesidades de cada usuario.
1. Versión online: rapidez e sinxeleza sen instalacións
A principal novidade desta versión é a aposta pola versión online, dispoñible en https://online.exelearning.net.
Esta modalidade está pensada para quen quere comezar a traballar de forma inmediata, sen instalar nada no seu equipo. Basta con acceder desde o navegador para crear, editar e descargar contidos educativos.
A versión en liña é, polo tanto, a opción máis rápida e sinxela para o profesorado. Permite traballar con eXeLearning desde calquera ordenador con conexión a internet e descargar despois os materiais xerados para conservaros ou publicalos onde se necesite.
É importante ter en conta que esta versión non funciona como un espazo de almacenamento na nube. É dicir, permite crear e descargar contidos, pero non almacena os proxectos online de forma permanente. Por iso, unha vez rematado o traballo, é recomendable descargar o ficheiro correspondente e conservarlo no equipo ou no espazo de almacén habitual do usuario.
Tamén podes instalar o teu propio eXe online no teu servidor.
2. Versión de escritorio: para traballar en local e sen conexión
A versión de escritorio está pensada para quen prefire instalar eXeLearning no seu propio equipo. É a opción adecuada cando se necesita traballar sen conexión a internet ou cando se desexa gardar os proxectos de forma local.
Esta modalidade permite ao profesorado instalar a aplicación no seu ordenador, crear contidos educativos e almacenalos directamente no seu equipo. Resulta especialmente útil en centros con conectividade limitada ou para docentes que traballan habitualmente desde o mesmo dispositivo.
3. Versión Cloud: pensada para a colaboración
A versión Cloud está orientada a usuarios, centros ou institucións que necesitan dispoñer de eXeLearning mediante unha instalación en servidor. Esta opción permite traballar nun entorno na nube e ofrece unha experiencia máis completa, xa que combina a creación, edición, almacenamento de proxectos e traballo colaborativo entre usuarios.
Trátase da alternativa máis avanzada, especialmente adecuada para organizacións que desexan centralizar o uso de eXeLearning. Ademais de facilitar que varios usuarios poidan crear e editar contidos de forma colaborativa, incorpora unha páxina de administración desde a que é posible xestionar as credenciais de acceso, controlar o espazo de almacenamento e supervisar os proxectos aloxados na plataforma.
Desde esta administración tamén se pode ofrecer soporte aos usuarios e instalar estilos e iDevices que quedan dispoñibles para toda a comunidade de traballo. Deste xeito, a versión Cloud non só facilita a creación de contidos, senón que tamén permite organizar e manter un ambiente común adaptado ás necesidades do centro ou institución.
Esta opción resulta especialmente interesante para equipos docentes que traballan conxuntamente na elaboración de materiais, departamentos que comparten recursos ou institucións que desexan ofrecer un espazo común de produción, xestión e publicación de contidos educativos.
4. Plugins para LMS/CMS: Integración total na túa aula virtual
A terceira alternativa son os plugins para LMS/CMS, pensados para quen desexe utilizar eXeLearning directamente dentro de plataformas como Moodle, WordPress ou Omeka-S.
Isto facilita crear, editar e publicar contidos sen saír da plataforma habitual de traballo. É unha opción moi útil para centros educativos, docentes ou administradores que xa utilizan estes sistemas e queren incorporar eXeLearning ao seu fluxo de traballo diario.