Esta guía ten como finalidade acompañarnos na comprensión e creación de Recursos Educativos Abertos (REA) con eXeLearning, ofrecendo un percorrido claro, práctico e progresivo. A súa estrutura é modular, de modo que cada bloque pode traballarse de forma independente e graduada, xa que parte de nocións básicas sobre os REA e avanza cara a un uso máis completo da ferramenta.

O obxectivo non é só aprender a utilizar unha ferramenta dixital, senón comprender como crear recursos abertos con sentido pedagóxico, pensados para ser reutilizados, adaptados e compartidos en distintos contextos educativos.

Esta guía divídese en cinco bloques de contidos:

1. Os recursos educativos abertos. Neste bloque abórdanse os aspectos fundamentais dos REA. Explícase que son, que papel teñen as licenzas abertas e por que son importantes a accesibilidade, a calidade, a metodoloxía e a avaliación neste tipo de materiais. Tamén se ofrecen orientacións para atopar recursos libres, coñecer experiencias doutros docentes e reflexionar sobre como deseñar propostas educativas abertas, reutilizables e adaptables.
   
2. eXeLearning I: Primeiros pasos. Este apartado introdúcenos no uso de eXeLearning. Explícanse as opcións de acceso e instalación, preséntase a contorna de traballo e descríbense os seus elementos principais. Tamén se incorpora unha ferramenta crave para a creación de recursos: o xestor de arquivos, que nos permite organizar os materiais do proxecto e utilizalos de forma ordenada dentro do recurso.
3. eXeLearning II: Creación básica. Neste bloque comézase a crear un recurso sinxelo con eXeLearning. Trabállase a configuración inicial do proxecto mediante os metadatos, o uso do iDevice Texto para incorporar contidos e a selección de estilos para definir a aparencia visual do recurso.
4. eXeLearning III: Creación avanzada. Este apartado amplía as posibilidades de creación con eXeLearning. Preséntanse funcionalidades avanzadas do editor de textos, outros iDevices para incluír actividades, xogos, avaliación e interactividade, e opcións de configuración desde as propiedades do recurso. Tamén se explican utilidades que axudan a revisar, optimizar e mellorar o proxecto antes de exportalo ou publicalo.
5. eXeLearning IV: Uso e publicación. Neste bloque explícanse diferentes formas de utilizar, compartir e publicar os recursos creados con eXeLearning. Abórdanse opcións como eXeViewer, a exportación para uso sen conexión, a publicación en Procomún e as posibilidades de integración con Moodle. O obxectivo é coñecer distintas vías para difundir os REA e facilitar o seu acceso, reutilización e adaptación en diferentes contextos educativos.