Versión Orixinal

"Waltzing Matilda" é unha canción desenvolvida no estilo australiano de poesía e música folk chamado Bush Ballad.

O Bush Ballad é un estilo de poesía e música popular que representa a vida, o carácter e a paisaxe do bosque (bush) australiano.

A típica bush ballad emprega unha estrutura de rima sinxela para narrar unha historia, moitas veces de acción e aventura, e utiliza unha linguaxe colorida e coloquial australiana. As baladas varían en tons de humorísticos a melancólicos, e moitas exploran temas do folclore australiano: secas, inundacións, vida na fronteira, relacións entre australianos indíxenas e non indíxenas...

O poeta australiano Andrew Barton "Banjo" Paterson escribiu a letra para "Waltzing Matilda" en agosto de 1895 mentres se hospedaba na Dagworth Station, un rancho de ovellas e gando propiedade da familia Macpherson en Australia.
A letra foi escrita inspirándose nunha melodía tocada nunha cítara por Christina Macpherson, de 31 anos, membro da familia. Christina escoitara a canción "The Craigielee March", interpretada por unha banda militar, mentres asistía ás carreiras de cabalos de obstáculos en abril de 1894, e tocouna de oído en Dagworth. Paterson decidiu que a música sería unha boa peza para poñer letras e entre os dous produciron a versión orixinal "Waltzing Matilda".
A partitura publicouse por primeira vez en 1903.

O título da canción en argot australiano refírese a viaxar a pé (waltzing) coas súas pertenzas nunha "matilda" (swag, tenda de campaña) colgada sobre as costas.

A canción narra a historia dun vagabundo que acampa unha noite xunto a unha lagoa (billabong), mentres toma o té. Unha ovella (jumbuck en inglés australiano) vén a beber auga e o vagabundo róubaa para comer. O propietario dáse conta e chama a tres policías para que o deteñan. O vagabundo, antes de ser detido polo roubo da ovella, prefire botarse á auga e afogarse. A canción remata contando que a pantasma do vagabundo se escoita cantar unha canción que invita aos viaxeiros a bailar con el, é dicir, a saír aos camiños e viaxar a pé.

Todo o folclore que rodea á canción e ao proceso da súa creación estendeu a súa popularidade ata o punto de ter o seu museo propio (o Waltzing Matilda Center) e ser descrita coma o "himno nacional non oficial" de Australia.

Extracto e tradución da Wikipedia