Economía

O pasado martes, 26 de maio, o alumnado de 4º ESO e de FP Básica de Peiteado participou na Xincana Localízate, unha actividade organizada pola Consellería de Emprego, Comercio e Emigración co obxectivo de achegar ao alumnado á realidade do comercio local.

Durante os últimos meses, os participantes estiveron analizando diferentes establecementos da súa contorna e traballando no deseño dun modelo de negocio viable. O proxecto propoñía a creación e definición dunha idea que puidese ser implementada nun comercio local, contribuíndo a conectar estes negocios cun público mozo de entre 18 e 30 anos.

Entre todos os proxectos presentados, aqueles que destacaron pola súa viabilidade foron convidados a participar nesta xincana pola cidade de Pontevedra, na que o alumnado puido seguir descubrindo o valor do comercio de proximidade dunha forma dinámica e participativa.

Aínda que o premio final foi para un dos equipos participantes, queremos felicitar a todo o alumnado polo esforzo, a implicación e o traballo desenvolvido ao longo de todo o proxecto.

Parabéns a todas e todos!

Clic na imaxe para acceder ao álbum

O equipo NATURLAC, formado por Estela Abilleira, Lía Bascoy e Mateo Méndez, vén de acadar un magnífico 14º posto a nivel nacional na Gran Final do programa Young Business Talents en Madrid.

Tras superar nas fases previas a máis de 3.000 equipos de toda España, o noso alumnado competiu cos 100 mellores proxectos do país, logrando uns beneficios de 68.030.000 euros para a súa empresa láctea virtual. 

Máis alá destas excelentes cifras, dende o centro queremos destacar a verdadeira aprendizaxe desta experiencia. O equipo demostrou unha grande capacidade de análise, solvencia baixo presión e un excelente traballo en equipo na toma de decisións.

Ademais da competición, puideron gozar dun pouco de turismo pola capital para celebrar o esforzo de todos estes meses.

Parabéns polo voso traballo!

Clic na imaxe para acceder ao álbum de fotografías

O alumnado de 4º de ESO que cursa a materia de Formación e Orientación Persoal e Profesional realizou unha interesante visita ao CIFP A Xunqueira co obxectivo de coñecer de primeira man a oferta de ciclos formativos e as súas saídas profesionais.

Durante a xornada, a orientadora do centro, Cristina, guiounos polas distintas instalacións, explicando con detalle o funcionamento e contidos dos ciclos que se imparten. O alumnado puido comprobar como se traballa nos talleres e aulas de electrónica, onde observaron as salas de audio e vídeo; no ciclo de atención á dependencia, coñecendo os recursos e materiais empregados para a atención ás persoas; no ámbito de madeira e moble, visitando os espazos destinados ao deseño e fabricación; e tamén no ámbito de mantemento de vehículos, onde puideron ver reparacións e traballos sobre vehículos. 

A visita resultou moi enriquecedora, xa que permitiu ao alumnado achegarse á realidade da Formación Profesional dun xeito práctico e directo. Poder ver os espazos, falar co profesorado e coñecer as experiencias do alumnado do centro axúdalles a tomar decisións máis informadas sobre o seu futuro académico e profesional.

Ademais, proximamente realizarán unha actividade similar no noso propio centro educativo, onde tamén se imparten diferentes familias profesionais, como son as de electricidade, fabricación mecánica, imaxen persoal e sanitaria. Esta nova visita permitirá completar a visión do alumnado sobre a ampla oferta de Formación Profesional dispoñible, facilitando unha reflexión máis profunda e fundamentada sobre o seu futuro formativo.

Clic na imaxe para acceder ao album

O alumnado de 1º de Bacharelato clasificouse para a final do Torneo de Debate Económico, organizado polo Consello Xeral de Economistas de España, en colaboración co Banco de España, a CNMV e o Ministerio de Economía.

O equipo, integrado polas nosas brillantes alumnas Lucía Blanco, Isabela Cortizo, Sandra Domínguez, Antía Fernández, Paula Gómez e Elia Ogando, realizou unha magnífica actuación na fase provincial de Pontevedra, celebrada o pasado 12 de febreiro. Grazas ao seu esforzo, preparación e talento, acadaron o primeiro posto, asegurando así o seu pase á final nacional.

A gran cita terá lugar os próximos 5 e 6 de marzo en Madrid, onde representarán con orgullo o noso centro e a provincia de Pontevedra. Neste caso o debate consistirá en defender posturas a favor e en contra en relación á seguinte cuestión: “É a utilización do diñeiro dixital máis eficiente e responsable que o diñeiro en efectivo?”

Parabéns por este grande logro e moita sorte na final! Estamos moi orgullosos de vós.

#OrgulloFreiMartínSarmiento #DebateEconómico #TalentoNovo #RumboAMadrid #EconomíaFREI

Educación financiera en Pontevedra: éxito en la Final Territorial del Torneo de Debate Económico y Concurso Audiovisual 2026

Clic na imaxe para acceder ao álbum