O alumnado de Economía de 4º de ESO descobre o motor empresarial de Galicia en Pérez Rumbao.
No marco do programa EduEmprende da Consellería de Educación, Ciencia, Universidades e Formación Profesional, o alumnado de 4º de ESO da materia de Economía e Emprendemento participou na iniciativa EduTecEmprende. Esta actividade ten como obxectivo principal fomentar as capacidades emprendedoras e o coñecemento da realidade empresarial da nosa contorna.
Durante a xornada, visitamos as instalacións de Vepersa (Pérez Rumbao) en Pontevedra. Alí fomos recibidos por Luis, xefe de postvenda, quen nos guiou nun percorrido detallado polo ciclo de vida dun vehículo no taller: dende a súa recepción ata a entrega final tras a reparación.
Máis alá da mecánica, Luis explicou a enorme estrutura que sostén a unha empresa como Pérez Rumbao, que conta con preto de 1.900 traballadores en toda Galicia. Os alumnos e alumnas puideron comprobar a diversidade de perfís profesionais e funcións que conviven nunha gran organización, comprendendo que o emprendemento e a xestión empresarial son motores fundamentais para o emprego na nosa comunidade.
Unha experiencia enriquecedora que axuda ao noso alumnado a conectar os contidos do currículo co mundo laboral real.
