Accede a web da Radio do Frei clicando na imaxe
Este curso 2025 2026 puxemos en marcha unha nova aventura FMS Radio. O que comezou como unha idea converteuse nun espazo de encontro, creatividade e aprendizaxe compartida, onde descubrimos que a radio é moito máis ca un micrófono: é unha forma de escoitar, comunicar, crear e aprender xuntas e xuntos.
Compartimos a MEMORIA DAS ACTIVIDADES desenvolvidas ao longo do curso 2025-2026, como resumo de todo o aprendido e do moito que aínda está por vir.
O alumnado de 1º da ESO viviu unha experiencia única achegándose ao mundo da radio profesional na emisora Radio Pontevedra Cadena SER.
Durante a visita, coñeceron os espazos de gravación e edición, descubriron como se constrúe un programa desde dentro e aprenderon claves fundamentais para comunicarse mellor: uso da voz, postura corporal e técnicas de respiración.
Pero o mellor estaba por chegar: participaron en directo nun programa de radio, sentindo os nervios e a emoción de falar nunha emisora real.
Ademais, tiveron a oportunidade de falar sobre o coidado dos animais domésticos con Guillermo Campos, veterinario de Poio quen respondeu ás súas preguntas e achegou recomendacións moi útiles.
Pero tamén houbo momento para a memoria: facía xusto un ano do apagón, e o alumnado recordou ese día, compartindo en directo as súas reflexións e vivencias.
Esta actividade enmárcase dentro da nosa participación na II Edición dos Premios José Hermida que aposta pola radio como ferramenta de aprendizaxe.
Moitísimas grazas a todo o equipo de Radio Pontevedra pola cariñosa acollida. Así da gusto aprender!
@premiosjosehermidaradio #FMSRadio #RadioEscolar #IesFreiMartinSarmiento #PremiosJoseHermida
Pincha na imaxe para acceder ás fotografías do álbum
Participamos na xornada radiovisual interescolar Ponte nas Ondas, compartindo directo arredor do patrimonio cultural galego. O noso programa Son da Terra puxo o foco na gaita como símbolo da nosa identidade. Sara, Jialan e Mateo alumnos de 1º de Bacharelato entrevistaron ao noso profe e gaiteiro Flavio nunha conversa chea de historia, emoción e reflexión sobre o valor da música tradicional. O final?… Espectacular. Unha peza en directo preparada especialmente para esta xornada que interpretou Flavio xunto a Roberto, Xosé e Rocío, da Asociación Os Fervellos do Pío.
Aprender a dubidar tamén é aprender. Na biblioteca do noso centro, alumnado de 1º de Bacharelato e do ciclo medio de Mecanizado participou dunha charla moi necesaria sobre bulos, fake news e a detección de información falsa. Da man de Luz, Alfonso e Mamen, da Cadena SER de Radio Pontevedra, reflexionamos sobre como identificar noticias falsas, tanto en redes sociais como en medios, e sobre o impacto real que poden ter na sociedade. Porque non todo o que parece noticia… é verdade. Grazas @premiosjosehermidaradio por facernos pensar, cuestionar e mirar a información con ollos críticos.
© Xunta de Galicia. Información mantida e publicada na Internet polo centro educativo
Mapa do sitio - Contacto co centro - Accesibilidade - Aviso Legal
