Outubro 2025 🍂
Outubro chegou cargado de traballo na nosa horta escolar: despois do peche da tempada anterior, tocaba pasar páxina, dicindo adeus aos cultivos que xa cumpriran o seu ciclo e abrindo espazo para as novas sementeiras que nos acompañarán durante o inverno.
🍂
As tomateiras pechan o ciclo
As tomateiras, que tanto nos deron ao longo do curso pasado, xa morreron. Pero na horta nada se perde: retiramos as plantas e deixamos que pasen a formar parte do abono baixo a terra dos nosos hortos. A propia planta volve á terra para alimentar a seguinte xeración de cultivos.
🌱
Tirabeques de novo
Recuperamos un dos cultivos que mellor resultado nos deu o ano pasado: os tirabeques. Daquela sementáranse a uns 1 cm de profundidade, cunha densidade de 6 a 9 sementes por metro cadrado. Para preparar o terreo, usamos o compost xerado na nosa propia composteira durante o ano anterior.
🪴
Substrato novo en dous bancais
Enchemos de novo substrato en dous bancais da zona superior, deixándoos listos para as próximas plantacións. Alí sementaremos berzas e cenourias, dous cultivos que ano tras ano demostran ser especialmente agradecidos e resistentes na nosa horta.
Outubro segue sendo o mes da reorganización: limpeza de marxes, sementeiras ó chou ou en liña, recollida e conservación de sementes propias (como fixemos fai 2 anos coa kale) e transplante de plantas xa desenvolvidas. Cada xornada na horta é, sobre todo, unha lección de paciencia e de planificación a longo prazo.
Para pensar
• Por que é boa idea deixar que as plantas xa rematadas se descompoñan na propia terra do horto en vez de retiralas por completo?
• Que vantaxes ten usar compost propio, feito a partir dos restos do noso horto, fronte a empregar abono comprado?
