EXPRESIÓNS RELACIONADAS COA LENDA DE TROIA

• ter unha voz estentórea, ir de Escila a Caribde, tecer a tea de Penélope, escoitar cantos de sereas, síndrome de Casandra     

“TER UNHA VOZ ESTENTÓREA”

GALEGO: “ter unha voz estentórea”.

SIGNIFICADO ACTUAL: utilízase esta expresión para facer referencia a unha persoa que fala cun volume de voz moi elevado. Voz retumbante, potente, ruidosa e adecuada para pronunciar discursos a grandes multitudes.

ORIXE: remóntase ao heraldo da Ilíada Esténtor, que segundo Homero tiña unha voz igual á de cincuenta homes xuntos.

 

 “IR DE ESCILA A CARIBDE”

GALEGO: “ir de Escila a Caribde”.

SIGNIFICADO ACTUAL: expresión que significa saír dun perigo para meterse noutro peor. Pode ser sinónimo de “dilema”.

ORIXE: Escila e Caribde son dous perigosos escollos mariños convertidos en  monstros pola mitoloxía grega que aparecen na Odisea de Homero. Estos monstros estaban situados en lados opostos da costa de Italia e supuxeron para Ulises e os seus compañeiros superar un perigo para meterse noutro peor.

 

 

Odiseo ante Escila e Caribde. Johann Heinrich Füsli.

 

“TECER A TEA DE PENÉLOPE”

GALEGO: “tecer a tea de Penélope”.

SIGNIFICADO ACTUAL: facer algo inútil e que nunca remata.

ORIXE: mentres Ulises non regresaba da guerra de Troia, Penélope entretiña aos pretendentes ao trono de Ítaca prometéndolles que elixiría a un deles cando rematase unha tea que estaba tecendo. Non obstante, a tea nunca remataba pois Penélope desfacíaa pola noite.

 

 

Penélope e os pretendentes. John William Waterhouse.

“ESCOITAR CANTOS DE SEREAS”

GALEGO: “escoitar cantos de sereas”.

SIGNIFICADO ACTUAL: escoitar algo que atrae irremediablemente aínda que é potencialmente dañino e perigoso.

ORIXE: na mitoloxía clásica as Sereas atraían cos seus cantos aos mariñeiros, facéndolles perder o control dos seus barcos. O único que puido escoitalas e se salvou foi Ulises, que grazas ao seu enxeño atouse ao mastro do navío.

 

 

Ulises e as sereas. Herbert James Draper.

 

“SÍNDROME DE CASANDRA”

GALEGO: “a síndrome de Casandra”.

SIGNIFICADO ACTUAL: úsase cando advertencias, recomendacións ou predicións válidas son desbotadas ou non tomadas en conta.

ORIXE: Casandra era filla de Príamo, rei de Troia. Apolo estaba namorado dela, pero Casandra rexeitouno e o seu castigo foi ter o don da adiviñación e non poder ser crida por ninguén.

 

 
Áiax disponse a arrastrar a Casandra agarrada á estatua de Atenea. Copa ática de figuras vermellas. 440-430 a.C.