Se tes coñecementos previos do idioma que queres estudar, tes dúas maneiras de acceder a un curso superior ao primeiro (A1 ou A2, dependendo do idioma): acceso directo por titulación ou proba de clasificación.
Acceso directo por titulación
Se tes un título ou certificado emitido por outra institución, podes consultar nos seguintes documentos o curso ao que podes acceder.
- Accesos directos para galego e español como lingua estranxeira.
- Accesos directos para os demais idiomas: Orde do 21 de xuño de 2016
- O alumnado con bacharelato aprobado pode acceder ao nivel B1 da lingua cursada como primeira lingua estranxeira.
- O alumnado coa ESO aprobada pode acceder ao nivel A2 da lingua cursada como primeira lingua estranxeira.
- Se cursaches plans de estudos de EOI anteriores, consulta aquí as pasarelas.
Para poder obter o acceso directo por titulación hai que presentar a copia do título ou certificado correspondente (no caso de acceso directo desde o Bacharelato ou a ESO, pode presentarse o libro de escolaridade ou un certificado do IES) no momento de formalizar a matrícula, xunto co resto da documentación, na propia plataforma de matrícula.
O acceso directo obtense para o nivel especificado nos documentos enlazados máis arriba, non para un curso inferior ou superior. Unha vez comezado o curso, se non se estivo matriculado no ano académico anterior na EOI no mesmo idioma, o titor/a poderá propoñer unha recolocación de nivel, de ser o caso.
Este tipo de acceso non outorga as certificacións de niveis anteriores da EOI.
Proba de clasificación
A proba de clasificación está pensada para o alumnado que se quere matricular nos estudos oficiais das escolas oficiais de idiomas e xa ten coñecementos previos, pero non un certificado que o acredite. Consiste nunha proba que diagnostica o teu nivel do idioma e dá acceso a un curso determinado.
Hai que ter en conta que:
A proba de clasificación non certifica un nivel de lingua, senón que estritamente fixa o nivel de acceso en caso de quererse matricular nos estudos de EOI na modalidade oficial.
A proba de clasificación non outorga automaticamente unha praza.
Non se pode facer a proba en setembro se xa te matriculaches para o curso que comeza ese mesmo mes.
Poderán facer a proba de clasificación aquelas persoas que desexen acceder por primeira vez ás ensinanzas de idiomas na modalidade presencial e semipresencial.
A proba dá acceso a un curso concreto e só a ese curso; isto quere dicir que non poderás matricularte nun curso inferior ou superior ao que indique a proba.
A proba terá validez para matricularse na modalidade oficial no curso no que se realice e no seguinte.
Se a proba dá acceso a un nivel xa cursado ou superado anteriormente, a proba quedará sen efecto.
Para acceder a estudos das EOI, mesmo a través da proba de clasificación, deberás ter 16 anos antes de rematar o ano en curso, ou 14 se é para cursar un idioma distinto ao que estás a cursar na ESO como primeira lingua estranxeira.
Non poderá facer a proba o alumnado matriculado na modalidade oficial na EOI nos dous últimos cursos.
O alumnado poderá matricularse nunha soa proba de clasificación por cada idioma durante un curso escolar.
Procedemento de inscrición nas probas de clasificación:
Cubrir o seguinte formulario: Formulario para español | Formulario para as outras linguas
Pagar as taxas: A taxa para poder presentarte á proba de clasificación é de 17 € (instrucións para o pago de taxas - os pasos son os mesmos, só cambia a contía)
Exencións e descontos (en todos os casos deberase acreditar documentalmente o dereito ás exencións):
Familias numerosas de categoría xeral: pagarán unha taxa de 8,5 €
Familias numerosas de categoría especial, funcionarios en activo dos corpos docentes, persoas cun grao de minusvalía igual ou superior ao 33%, vítimas de actos terroristas (así como os seus cónxuxes e fillos), vítimas de violencia de xénero (así como os seus fillos): pagarán unha taxa de 0 €
Enviar o formulario, o xustificante de pago de taxas e a copia do DNI/NIE/pasaporte a eoi.corunha.secretaria@edu.xunta.gal