Na Educación Infantil, cando a lectura convencional aínda non está adquirida, a AMI convértese nun recurso clave para iniciar a comprensión lectora. A interpretación guiada de imaxes, símbolos e contidos audiovisuais permite ao alumnado establecer relacións entre o visual e o lingüístico, construíndo as primeiras habilidades de lectura. Do mesmo xeito, as narrativas audiovisuais axudan a comprender a secuenciación de feitos, mentres que o acompañamento adulto no consumo mediático favorece o desenvolvemento do vocabulario e da oralidade. Ademais, introducir preguntas sinxelas sobre intención, personaxes ou realidade das historias inicia ao alumnado no pensamento crítico aplicado á lectura.
As metodoloxías activas (como a aprendizaxe baseada en proxectos, a aprendizaxe cooperativa, a gamificación e mais a indagación guiada) resultan especialmente pertinentes neste proceso. A través de experiencias lúdicas, o uso de TIC e a mediación docente, o alumnado pode explorar e representar mensaxes mediante imaxes, sons e símbolos, comprendendo mellor a contorna mediática que o rodea. Estas prácticas sentan así as bases dunha futura lectura crítica e dunha comunicación significativa en múltiples linguaxes.
- A Aprendizaxe Baseada en Proxectos (ABP) permite que o alumnado investigue e cree produtos como contos ou libros dixitais, traballando con información visual, sonora e textual de maneira significativa.
- A Aprendizaxe Cooperativa promove o traballo entre iguais a través de roles diferenciados e creacións colectivas, tanto en formatos dixitais coma físicos.
- A Gamificación introduce dinámicas de xogo para aumentar a motivación e facilita que o alumnado analice contidos dixitais mediante retos, misións e recompensas simbólicas.
- Finalmente, a Aprendizaxe baseada na Indagación (ABI) estimula a curiosidade e o pensamento crítico mediante preguntas abertas e a exploración de múltiples medios para dar resposta a esas cuestións.
En conxunto, estas metodoloxías permiten que o alumnado se apropie da linguaxe mediática desde unha perspectiva lúdica e guiada, sentando as bases dunha competencia lectora multimodal e dunha alfabetización mediática axeitada ás primeiras idades.