O programa InnovaTech FP é unha iniciativa que promove a innovación tecnolóxica e o emprendemento industrial no ámbito da Formación Profesional, ofrecendo ao alumnado a oportunidade de traballar en retos reais propostos por empresas líderes. No IES de Vilalonga, participamos activamente nesta proposta coa ilusión de converter as ideas do noso alumnado en solucións útiles para a sociedade.
Este programa baséase na resolución de 20 retos tecnolóxicos, nos que os equipos deben desenvolver solucións innovadoras que teñan un impacto positivo, especialmente no desenvolvemento do medio rural. O traballo realízase en equipos multidisciplinares e diversos, fomentando a colaboración entre diferentes perfís profesionais e promovendo a igualdade de oportunidades.
No caso do noso centro, o IES de Vilalonga presentou propostas a dous retos especialmente relevantes:
- O reto impulsado por L'Oréal, centrado no deseño dunha plataforma dixital para a xestión integral de salóns de perruquería, incorporando criterios de sostibilidade e mellora da experiencia do cliente.
- O reto proposto por Veolia, enfocado na economía circular mediante a transformación de residuos de depuración en recursos reutilizables.
Este proxecto reforza o compromiso do IES de Vilalonga coa formación de profesionais preparados para os retos do futuro, apostando por unha educación conectada coa realidade, coa innovación e co desenvolvemento sostible.
