Este venres 5 de xuño, os dous equipos do IES de Vilalonga clasificados para a final de InnovaTech FP achegáronse a Ourense para realizar a presentación dos seus proxectos ante as empresas participantes e o xurado.
O equipo Limnora presentou un dispositivo orientado a dar solución ao reto medioambiental formulado por Veolia, que permite facer unha xestión máis eficiente dos recursos mediante a redución de residuos. No deseño desta proposta innovadora participaron Nicolás Mascato, Roi Bravo, Miguel Ángel Reyes e Marco Germaná.
Pola súa banda, o equipo Galibrila deu resposta ao reto formulado por L'Oréal mediante unha aplicación de xestión integral para perruquerías, que abrangue desde a parte económica ata a promoción e o contacto coa clientela, incorporando ferramentas de intelixencia artificial. Levaron a cabo este proxecto Gemma Sineiro, Iago Montenegro, Andrés González e Lucía Pérez.
Ambos equipos implicaron, nun exemplo de colaboración entre as diferentes ensinanzas do centro, a distintos departamentos nos proxectos realizados, como o Departamento de Automoción, para a construción do dispositivo de prensado de residuos, ou o Departamento de Polos Creativos, na elaboración de merchandising coa impresora 3D e a cortadora láser.
Noraboa polo excelente traballo realizado!
