Os profesores do departamento de Informática, Alejandro Vidal e Víctor Saiáns, viaxaron recentemente a Castellana Grotte (Italia) grazas a unha mobilidade de formación do programa Erasmus+. O obxectivo desta visita ao instituto I.I.S.S. "Luigi dell'Erba" foi intercambiar estratexias metodolóxicas nas áreas TIC, as disciplinas STEM e a robótica educativa. Durante a estancia, os nosos docentes achegaron a súa experiencia particupando en formacións especializadas sobre o uso de ferramentas de Intelixencia Artificial aplicadas á educación e á programación asistida. Ademais, compartiron coñecementos sobre tecnoloxías como Python, a visión artificial e a súa integración en proxectos de robótica. Máis alá do intercambio docente, a visita centrouse no futuro do noso alumnado, contactando con empresas como Nextome para abrir novas prazas de prácticas internacionais (FCT). Deste xeito, o IES de Teis segue a ampliar a súa rede de socios en Europa, creando pontes que se traducirán en excelentes oportunidades formativas e laborais para os nosos estudantes.
