Son Marta, profesora do departamento de Informática, e esta semana tiven a gran sorte de desfrutar dunha bolsa Erasmus+ para realizar un job shadowing en Tartu (Estonia), no Tartu Vocational College (VOCO), o instituto de formación profesional desta cidade.
Neste centro impártense ciclos de diversas familias profesionais, entre as que se atopan as de Imaxe Persoal e Informática.
Ao longo desta semana tiven a oportunidade de reunirme coas persoas responsables de acoller alumnado estranxeiro e falar sobre a posibilidade de enviar o noso alumnado a realizar prácticas alí, algo para o que mostraron total disposición. Ademais, tiven a ocasión de impartir dous talleres prácticos sobre contidos que habitualmente traballo en Teis: seguridade informática e despregamento en AWS (un deles incluso... en calcetíns!). Tamén puiden interactuar con alumnado e profesorado de módulos moi similares aos que impartimos en Vigo.
Cada experiencia Erasmus+ é sempre única e marabillosa. Volto coa cabeza chea de ideas, a neurona a tope... e moitísimas ganas de repetir! É incrible como, estando tan lonxe, podemos sentirnos tan preto; como os nosos ciclos se asemellan tanto; e como, a 3.000 quilómetros da casa, un pode sentir esa familiaridade e pertenza por formar parte de Europa.
Espero que esta experiencia sexa o inicio dunha colaboración duradeira entre ambas institucións.
