No deseño de actividades nun curso na Rede non poden aplicarse exactamente os principios que rexen para un curso presencial, dado que as condicións e medios das dúas modalidades formativas son diferentes. Debemos ser concienzudos e considerar todas as cuestións para que o alumnado poida realizar a tarefa ou actividade.
Nun ensino a distancia non abonda con “cargar” a actividade para realizar senón que, ademais, esta debe dispoñer de información que lle sirvan ao estudante como axuda e orientación para o seu desenvolvemento:
- Título da actividade (significativa e numerada).
- Descrición.
- Obxectivo e resultados que se esperan obter.
- Especificar se a van realizar de maneira individual, en grupo...
- Ofrecer os recursos que se poden utilizar para levala a cabo.
- Establecer un límite temporal e informar de maneira clara sobre este.
- Explicar como se fará o envío da mesma.
- Especificar o formato de presentación.
- Explicitar como se avalía.
Debe tratarse de actividades útiles para o alumnado e debemos fomentar, sobre todo a través do foro, a colaboración e axuda entre eles para a súa realización. Deste xeito, non só se guiarán uns a outros na súa aprendizaxe, senón que tamén lles axudaremos a romper o seu illamento e a que se sintan parte dunha comunidade.
As actividades poden ser individuais ou en grupo (este aspecto tratarase no apartado “avaliación”).
