A Biblioteca Escolar é un espazo no que desenvolver procesos educativos e de lecer relacionados co mundo da lectura e, nun sentido máis amplo, coa cultura, entendida no marco do século XXI. Tendo presentes os obxectivos da Unión Europea e da UNESCO recollidos na Axenda 2030, a Biblioteca Escolar debería imaxinarse como un espazo que atenda retos como:

A cohesión da comunidade educativa e a súa vinculación coa cultura dunha maneira transversal e integradora.
A formación de estudantes capaces que desenvolvan as súas capacidades de maneira autónoma nun mundo que cambia de maneira constante.
O fomento da colaboración, o traballo en equipo e a participación activa na vida da comunidade.
A formación no uso eficaz, ético, crítico e seguro das tecnoloxías da información, da aprendizaxe e da comunicación, para compensar posibles brechas sociais.
A contribución ao benestar e a atención á saúde mental dos menores, así como o respecto aos seus dereitos.
O compromiso co desenvolvemento sostible.

2.1.1. Organización dunha Biblioteca Escolar

Antes de poñer en marcha unha biblioteca escolar, cómpre:

Buscar a maneira de implicar todos os sectores no deseño da estratexia que seguirá a biblioteca.
Recoller as ideas da comunidade educativa (estudantes, profesorado, persoal non docente e familias) para así poder definila.
Investigar como están expostas outras bibliotecas de referencia para tomar ideas e aprender de como afrontaron distintos retos e a súa resposta ás diversas necesidades que atoparían nos seus contextos.
O traballo en rede (seminarios, equipos de traballo, colaboracións esporádicas) para optimizar diversos recursos.

Á hora de expor a organización dunha biblioteca escolar, polo tanto, hai que contemplar:

Contexto no que se debe traballar:

Debe estar integrada na vida escolar e o seu deseño ten que se adaptar ao tipo de centro, ás etapas e aos niveis educativos que cobre, ao número de alumnos e alumnas e a tamén a calquera outra particularidade.
Ter presentes os proxectos didácticos que se desenvolven no centro, as actividades extraescolares programadas polos docentes ou as principais liñas do proxecto educativo do centro.
Debe converterse nun espazo de encontro que xere dinámicas de innovación, e servir de ponte entre o centro educativo e a vida cultural externa ao centro, de xeito que se facilite o achegamento á biblioteca de toda a comunidade.

As funcións da biblioteca escolar incumben os diferentes axentes cos que debería traballar: estudantes, profesorado, familias, entidades culturais... Debemos ter claro que os seus ámbitos de actuación e as súas funcións son:

Facilitar o acceso a información e a recursos actualizados e diversos, en diferentes soportes, linguas e linguaxes, que respondan as necesidades de todas as áreas de estudo.
Contribuír á innovación educativa, apoiando os departamentos didácticos no desenvolvemento do currículo e impulsando a actualización do profesorado.
Proporcionar espazos para o encontro cun mesmo e cos demais, para a reflexión e a lectura.
Propiciar o contacto cos libros e a cultura; reforzar os proxectos do centro e servir de ponte entre o centro e a súa contorna.
Colaborar na formación do espírito crítico e na alfabetización mediática e informacional dos estudantes.
Fomentar a autonomía, a curiosidade e a creatividade necesarias en cidadáns letrados e activos do século XXI.

O espazo físico e dixital da biblioteca ha de ter unhas características que contribúan a que poida cumprir o seu papel estratéxico:

Lugar diferenciado no edificio (idealmente, debería poder accederse a ela tamén desde o exterior), e debe coidarse a ambientación na propia sala.
Espazo vivo, con zonas diferenciadas que dean resposta ás distintas funcións que se mencionaron para a biblioteca, e que poidan modificarse facilmente.
A contorna convén que sexa ampla, luminosa, climatizada, ordenada e acolledora, con boa conectividade, que estimule a lectura, a aprendizaxe e o descubrimento de novos intereses e inquietudes.
Mobiliario funcional. Habería que evitar a práctica de reutilizar os armarios, mesas e cadeiras que se retiran doutros espazos do centro.
Débese garantir a accesibilidade de todos os usuarios, e contar cunha boa sinalización que facilite identificar os espazos e permita localizar e utilizar a información e os recursos que se precisen. Ten que incluír:
1. Espazos para o traballo en grupo e a lectura silenciosa.
2. Espazos para talleres manipulativos, como maquetación ou robótica.
3. Áreas destinadas a xogos de mesa ou electrónicos.
4. Espazos para conferencias ou charlas monográficas; un set de gravación e edición de vídeos ou unha emisora para gravar.
5. Unha zona habilitada para exposicións.
O espazo virtual da biblioteca escolar tamén debería resultar atractivo e actualizarse con frecuencia con informacións relacionadas, coas novidades na colección e con actividades que se organicen desde a biblioteca, co fin de proxectar a biblioteca (e o centro) fóra das súas paredes.

A colección de libros e recursos debe ser coidada, equilibrada e actualizada con materiais de todo tipo.

O seu persoal ten que contar con formación específica, ter mirada pedagóxica e dispoñer dunha dedicación horaria para súa xestión, elementos sen os cales non se entendería o concepto de biblioteca escolar.