Os pasados 9 e 10 de abril, o departamento de Imaxe Persoal do IES de Teis participou no evento celebrado en Mos, dentro do espazo “Formamos”, onde alumnado e profesorado representaron a oferta formativa dos nosos ciclos.
Durante estas xornadas, o noso stand converteuse nun punto de encontro dinámico e participativo, no que as persoas visitantes puideron coñecer de primeira man as competencias profesionais que se adquiren nos nosos ciclos, así como observar demostracións en directo relacionadas co ámbito da estética, caracterización e peiteado.
O alumnado foi protagonista activo, amosando o seu talento, creatividade e destrezas técnicas, sempre acompañado polo profesorado, que explicou os itinerarios formativos, as saídas profesionais e as oportunidades que ofrece estudar no noso centro.
A experiencia foi moi enriquecedora, tanto para quen se achegou a descubrir a nosa proposta educativa como para o propio alumnado, que puido desenvolver habilidades comunicativas e vivir unha experiencia real de contacto co público.
Desde o IES de Teis seguimos apostando por unha formación práctica, pública, actualizada e conectada co contorno profesional, preparando o noso alumnado para un sector en constante evolución.
