Programas Innova-Lab: MAT-LAB e INTER-LAB
Durante o curso 2025/2026, o IES Moncho Valcarce participou nos programas Innova-Lab MAT-LAB e INTER-LAB, apostando pola innovación educativa, a internacionalización do centro e o desenvolvemento de propostas que achegasen a ciencia e as matemáticas ao alumnado dunha maneira práctica, creativa e motivadora.
🔬 MAT-LAB: matemáticas para experimentar, crear e descubrir
No marco de MAT-LAB desenvolvéronse ao longo do curso diferentes actividades destinadas a mostrar as matemáticas desde perspectivas diversas e conectadas con situacións reais. Entre elas destacan o Concurso de Esopías Literarias, cunha ampla participación do alumnado, e o Concurso de Fotografía Matemático-Tecnolóxica, que convidou a descubrir elementos matemáticos presentes na contorna do centro. As fotografías finalistas son as que se poden ver na nosa páxina web principal.
Tamén se celebrou a Semana das Matemáticas, con actividades manipulativas e creativas como un obradoiro de papiroflexia, a elaboración dun helicone mediante cortadora láser e impresión 3D e unha situación de aprendizaxe na que o alumnado tomou medidas reais da aula para aplicar posteriormente conceptos xeométricos no seu proxecto de pintado.
A dimensión artístico-matemática estivo presente tamén nunha exposición de composicións xeométricas realizadas con fíos e cordas mediante a técnica de string art.
O alumnado participou, ademais, na VI Olimpíada Científica Xuvenil, na que o equipo Concienci-Hadas acadou o terceiro posto a nivel autonómico, un excelente resultado que puxo en valor o traballo e a implicación do alumnado e do profesorado.
Parte dos traballos e materiais elaborados foron presentados en Ponte nas Ciencias, I Feira Científica das Pontes, achegando as matemáticas á comunidade e permitindo compartir o traballo realizado cun público de máis de 800 persoas. As diferentes actividades foron tamén difundidas ao longo do curso a través dos espazos expositivos e medios de comunicación do centro.
🌍 INTER-LAB: un centro conectado con Europa
A través de INTER-LAB desenvolveuse o proxecto eTwinning “Green Future: Climate Action with AI”, unha iniciativa internacional na que participaron centros de sete países, con 109 estudantes e 18 docentes.
O proxecto permitiu traballar sobre o cambio climático, a sustentabilidade e a cidadanía global mediante actividades colaborativas desenvolvidas en lingua inglesa e co apoio de ferramentas de intelixencia artificial. O alumnado creou vídeos, pósteres, historias animadas, presentacións, obras artísticas e outros produtos dixitais, ademais de analizar cuestións como os hábitos de consumo enerxético, os residuos ou diferentes fenómenos meteorolóxicos e desastres naturais.
Unha das experiencias máis significativas foi a elaboración de documentais mediante IA sobre diferentes desastres naturais e as súas posibles solucións, traballando no noso caso sobre a DANA de Valencia. Tamén se realizaron accións de limpeza do centro e da súa contorna, documentadas mediante fotografías de antes e despois e posteriormente convertidas nunha exposición de sensibilización ambiental.
A colaboración internacional combinou o traballo virtual cos encontros presenciais. Como culminación desta experiencia, o alumnado realizou unha visita á Escola Agrupada de Santo André, en Portugal, centro socio do proxecto, poñendo en práctica as competencias lingüísticas, plurilingües e interculturais desenvolvidas durante o curso.
Finalmente, os resultados de Green Future foron presentados en Ponte nas Ciencias, permitindo divulgar o proxecto ante a comunidade local. Ademais, os produtos realizados permaneceron expostos no centro e creouse, mediante a cortadora láser, un gran mapa de Europa no que se identifican os países participantes e o logotipo do proxecto. Este mapa continuará medrando nos vindeiros cursos como representación visual da crecente dimensión internacional do IES Moncho Valcarce.
MAT-LAB e INTER-LAB comparten así un mesmo propósito: aprender facendo, conectar disciplinas e abrir o centro ao seu contorno e ao mundo.
