Durante este curso, o IES Moncho Valcarce participou como centro socio colaborador no proxecto eTwinning “Green Future: Climate Action with Artificial Intelligence”, coordinado por un centro educativo de Turquía e desenvolvido xunto con centros de diferentes países europeos, entre eles Portugal, Italia, Moldavia e Ucraína.
O proxecto tivo como eixo principal a concienciación sobre o cambio climático e a protección do medio ambiente, incorporando ademais o uso da Intelixencia Artificial e de diferentes ferramentas dixitais como recursos para investigar, crear, analizar información e comunicarse con estudantes doutros países.
Ao longo do curso, o alumnado de 2º, 3º e 4º da ESO, coa participación dos departamentos de Bioloxía e Xeoloxía, Inglés e Educación Plástica, desenvolveu numerosas actividades relacionadas con diferentes problemáticas ambientais. Entre elas realizáronse observacións meteorolóxicas e análise de datos mediante ferramentas de IA, actividades sobre aforro enerxético, investigación sobre os dereitos da infancia, creación de carteis e logotipos, elaboración de curtametraxes mediante Intelixencia Artificial, intercambios de mensaxes nos que se imaxinaba como sería o mundo no ano 2050, creación de obras de Land Art, exposicións virtuais e accións directas de limpeza de espazos contaminados dentro da iniciativa “From Pollution to Action.
. 
. 
Un dos aspectos máis enriquecedores do proxecto foi a colaboración internacional. O alumnado compartiu os seus traballos e experiencias a través de TwinSpace, Padlet e outras ferramentas dixitais, comunicándose en inglés con estudantes doutros países e coñecendo diferentes perspectivas sobre os problemas ambientais. Esta dimensión internacional permitiu traballar non só os contidos científicos, senón tamén as competencias lingüísticas, dixitais, sociais e interculturais.
A experiencia tivo ademais unha dimensión presencial especialmente significativa coa celebración dunha xornada de encontro co Agrupamento de Escolas de Santo André (AESA), de Barreiro, Portugal. O alumnado puido coñecer persoalmente aos seus compañeiros e compañeiras portugueses, compartir experiencias e desenvolver as súas competencias comunicativas e sociais nun contexto real de intercambio europeo.
A implicación activa do alumnado foi un dos elementos fundamentais do proxecto. Os estudantes non foron simplemente receptores de información sobre o cambio climático, senón que participaron como investigadores, creadores e axentes de cambio: observaron a súa contorna, recolleron e analizaron datos, utilizaron novas tecnoloxías, deseñaron materiais de sensibilización e participaron en accións concretas para mellorar os espazos que os rodean.
Esta evolución puido comprobarse tamén mediante as enquisas realizadas ao inicio e ao final do proxecto a alumnado, profesorado e familias. A comparación dos resultados mostrou unha mellora especialmente significativa no alumnado en relación cos seus coñecementos sobre o cambio climático e as posibilidades da Intelixencia Artificial, evidenciando o impacto educativo das actividades desenvolvidas.
Como peche do proxecto, entregáronse diplomas de participación ao alumnado e creouse no centro un Erasmus Corner, un espazo permanente dedicado aos proxectos europeos. Para a súa elaboración deseñouse, en colaboración co equipo de Polos creativos, un mapa de Europa fabricado con materiais reciclados mediante a cortadora láser do centro, no que se sinalaron as localizacións dos centros socios. Este espazo nace con vocación de continuidade e seguirá medrando cos futuros proxectos e colaboracións internacionais do IES Moncho Valcarce.
. 
A participación en Green Future supón así un paso máis na aposta do centro pola internacionalización, a educación ambiental, a innovación educativa e a aprendizaxe competencial, demostrando que traballar conxuntamente con outros centros europeos permite ao alumnado aprender dunha maneira máis activa, significativa e conectada cos retos do mundo actual.
Podedes ver todas as actividades desenvoltas no noso TwinSpace.
