Durante o curso 2025/2026, o IES Moncho Valcarce participou na Rede PLANEA co proxecto “PLANEA de Arte, colaxes interxeracionais: a música dos teus avós”, desenvolvido co alumnado de 3º de ESO. A proposta buscou achegar o alumnado á música doutras xeracións e descubrir, a través das historias das súas familias, como cambiaron os gustos, os espazos e as formas de escoitar e vivir a música.
O alumnado converteuse en investigador da súa propia memoria familiar, realizando entrevistas a persoas maiores da súa contorna para coñecer as cancións que escoitaban, como accedían á música, onde a gozaban e que significado tiña para elas.
A partir das gravacións realizadas, os grupos traballaron nas aulas de informática para editar e mesturar os audios e crear composicións sonoras propias, empregando ferramentas dixitais e o programa Antropoloops. Deste xeito, as voces e os recordos das familias transformáronse en novas creacións musicais.
Un proxecto que permitiu combinar música, tecnoloxía e creatividade, pero tamén recuperar historias e lembranzas familiares, poñendo en valor a riqueza da nosa memoria colectiva e creando unha ponte entre as músicas de onte e as creacións de hoxe.
