Biblioteca do Conservatorio Superior de Música da Coruña
A Biblioteca do Conservatorio Superior de Música da Coruña é un servizo esencial de apoio á docencia, á investigación e á actividade artística do centro. Entre as súas funcións principais atópanse a recepción, catalogación, tratamento documental, almacenamento e difusión de libros, monografías, partituras e fondo sonoro, así como a súa función como punto de información cultural en ámbitos relacionados coa música.
O servizo de préstamo ten como finalidade facilitar o uso do fondo bibliográfico fóra das instalacións da Biblioteca, garantindo ao mesmo tempo a súa dispoñibilidade para o conxunto da comunidade educativa.
Usuarios
Teñen a condición de usuarios do servizo de Biblioteca:
- O alumnado matriculado no CMUS Superior da Coruña.
- O persoal docente e investigador.
- O persoal de administración e servizos.
- Persoas alleas ao centro expresamente autorizadas pola Dirección.
Cada usuario disporá dun carné persoal e intransferible. Para o uso do servizo de préstamo será necesaria a presentación do carné da Biblioteca ou, alternativamente, do DNI, a partir do cal o persoal bibliotecario poderá comprobar o número de usuario.
Organización da Biblioteca
- A Dirección do centro nomeará un coordinador ou coordinadora da Biblioteca, responsable da súa xestión e supervisión, en coordinación coa Secretaría para a adquisición de fondos.
- O coordinador contará co apoio dun equipo de profesorado, encargado da catalogación, ordenación e mantemento do catálogo.
- O profesorado con menor dispoñibilidade horaria asumirá tarefas de atención ao público, préstamo, vixilancia e outras funcións delegadas.
- O equipo de Biblioteca reunirase ao longo do curso académico, sendo o coordinador o encargado de convocar ditas reunións.
Horario
- Ao inicio de cada curso publicarase un horario xeral para cada cuadrimestre.
- O período ordinario de apertura da Biblioteca abrangue do 1 de outubro ao 31 de maio, quedando excluídos fins de semana, días festivos e períodos de exames.
Normas de préstamo domiciliario
Segundo as necesidades do servizo, cada exemplar destinarase a un tipo de préstamo:
- Préstamo domiciliario (prestables).
- Consulta en sala (non prestables).
Non son prestables:
- Traballos de fin de estudos.
- Obras de referencia (dicionarios, enciclopedias, etc.).
- Publicacións periódicas.
- Documentos antigos.
- Documentos modernos esgotados ou de difícil reposición.
Condicións do préstamo domiciliario:
- Prazo de préstamo: 15 días naturais.
- Número máximo: 3 exemplares por usuario.
- Nos períodos de vacacións (verán, Nadal e Semana Santa) poderán establecerse prazos extraordinarios, que se comunicarán con antelación.
- Os préstamos poderán renovarse por un período igual, ata un máximo de 3 veces, sempre que o documento non estea reservado por outro usuario. A renovación poderá realizarse desde 2 días antes da data de devolución.
Todos os préstamos serán rexistrados na aplicación MEIGA, onde consta a condición de préstamo ou consulta en sala de cada exemplar.
Incumprimento das normas de préstamo
A Biblioteca realizará reclamacións periódicas dos préstamos vencidos. A falta de aviso non exime do cumprimento dos prazos establecidos.
- O atraso na devolución implicará o bloqueo temporal do servizo de préstamo.
- A acumulación de dous atrasos nun mesmo curso académico considerarase infracción leve e suporá a suspensión do servizo durante un mes.
- As sancións eliminaranse ao finalizar o curso, sempre que non exista material pendente de devolución ou reposición.
- En caso de perda ou deterioro grave dun exemplar, o usuario deberá repoñelo por outro igual ou de características equivalentes. Ata que se produza a reposición, perderase o dereito ao servizo de préstamo.
- O incumprimento reiterado destas normas considerarase infracción grave e poderá supoñer a suspensión definitiva do dereito de uso da Biblioteca.
Calquera incidencia será resolta polo responsable da Biblioteca, podendo presentarse recurso ante a Dirección do centro.
Ningún alumno poderá obter o título correspondente nin ningún traballador recibir certificacións oficiais mentres teña obrigas pendentes coa Biblioteca.
Recursos e uso das instalacións
Os usuarios deberán respectar ás persoas usuarias, ás instalacións e aos fondos documentais, facendo un uso responsable dos recursos dispoñibles.
Por razóns de seguridade, hixiene e conservación non está permitido:
- Acceder con comida.
- Acceder con bebida, agás auga.
- Modificar a disposición do mobiliario.
A Biblioteca é un espazo de estudo e investigación, polo que se require silencio e non está permitido o uso de teléfonos móbiles acesos.
O persoal da Biblioteca poderá solicitar a identificación dos usuarios e aplicar as medidas necesarias para garantir o cumprimento das normas, incluída a expulsión temporal ou a suspensión do servizo.
Acceso a recursos dixitais: JSTOR
O Conservatorio Superior de Música da Coruña dispón dunha conta institucional propia en JSTOR, unha das principais bases de datos internacionais de contidos académicos.
JSTOR é unha biblioteca dixital que ofrece acceso a miles de revistas científicas, libros académicos, actas de congresos e materiais de investigación en ámbitos como a música, a musicoloxía, as artes escénicas, a historia, as humanidades e as ciencias sociais. Trátase dun recurso fundamental para o estudo avanzado, a investigación e a elaboración de traballos académicos.
O alumnado e o profesorado do centro poden realizar consultas en liña a JSTOR desde os equipos informáticos da Biblioteca, facendo uso da conta institucional do Conservatorio, de acordo coas condicións de uso establecidas.
Para calquera dúbida sobre o acceso ou funcionamento deste recurso, o persoal da Biblioteca prestará a asistencia necesaria.
Procura de libros e partituras
O fondo bibliográfico pode consultarse a través do sistema de xestión bibliotecaria dos Conservatorios Superiores de Música da Coruña:
