No noso centro está a acontecer algo un tanto curioso. Por un lado hai algúns mestres dedicados en exclusiva ao libro de texto, polo que a lectura e a escritura se limita a aquelas actividades que aparecen nos libros e que algo teñan que ver con estes ámbitos. E claro, o manexo da información non é moi preciso para realizar as actividades dos libros, polo que case podería dicir que apenas se traballa.
Por outro lado hai outro grupo de mestres moi interesados nas novas tecnoloxías, que fan actividades tales como grabacións de distintos tipos de lecturas que motivan moito ao alumnado e traballos de escrita que logo se publican en blogues ou na páxina do colexio e que, polo tanto, esixen realizar borradores previos. Ademais, desenvolven proxectos nos que o alumnado busca e trata, dalgún xeito, a información.
En calquera caso, é certo que o soporte impreso (agás o libro de texto) case non se manexa e, consecuentemente, os fondos bibliográficos da biblioteca. Incluso, ás veces, teño a sensación, e só é unha sensación, de que o libro impreso se contrapón ás novas tecnoloxías, o antigo e o moderno.
E non é menos certo, que non hai ningunha reflexión no centro acerca dos tres ámbitos: lectura, escritura e tratamento da información, polo que o modo de proceder de cada mestre é bastante dispar.
Como conclusión, creo que un proxecto lector reflexionado e consensuado no noso centro sería realmente preciso para achegar posturas e aproveitar o bo facer de cada un de nós.