O alumnado de 1º de ESO do IES de Teis desfrutou dunha enriquecedora xornada cultural no Parque Arqueolóxico de Campo Lameiro, un dos referentes máis importantes da arte rupestre ao aire libre en Galicia. Ao longo da visita guiada, os estudantes puideron descubrir como vivían os nosos antepasados e coñecer o significado dos petróglifos gravados nas rocas fai miles de anos. A experiencia permitiulles achegarse dun xeito dinámico e participativo á historia e ao patrimonio arqueolóxico da nosa contorna.
A actividade concluíu cunha divertida xincana polo recinto arqueolóxico, na que o alumnado puxo a proba todo o aprendido durante a xornada. A través de diferentes retos e probas de orientación, os participantes traballaron en equipo mentres exploraban a paisaxe natural e cultural do parque. Sen dúbida, foi unha experiencia educativa moi completa que combinou aprendizaxe, convivencia e diversión.
