O 21 de marzo celebramos o Día Mundial da Poesía, unha data moi especial para dar renda solta á creatividade, ás emocións e ás palabras que nacen do corazón.
Desde a nosa biblioteca queremos convidar a todo o alumnado a participar nun concurso de poesía moi especial.
Este ano, ademais, a proposta ten un significado único: celebramos os 50 anos do edificio no que se atopa a nosa escola, o CEIP López Ferreiro. Por iso, animámosvos a que sexa precisamente o noso centro a fonte de inspiración dos vosos versos.
As aulas, os recreos, as amizades, os recordos, o profesorado, os recunchos da escola… todo pode converterse en poesía! É unha oportunidade perfecta para expresar sentimentos, compartir vivencias e mirar o noso cole con ollos poéticos.
A poesía non é só escribir rimas: é xogar coas palabras, imaxinar, crear e descubrir novas formas de contar o que sentimos e pensamos. Cada poema é único, como cada un de vós.
Animádevos a participar e a encher o López Ferreiro de versos fermosos! Agardamos con ilusión as vosas creacións… deixade voar a imaxinación!
