O pasado luns, no marco das actividades de Biblioteca Creativa, tivemos a sorte de recibir a visita de Fernando, do Taller de Fer, pai de dous alumnos do centro, que xentilmente quixo compartir connosco o seu saber como artesán do coiro.
Ao longo da sesión, achegounos ao fascinante mundo deste material: aprendemos de onde procede, cal é o seu proceso de elaboración e en que consiste o curtido, unha técnica fundamental para transformar a pel nun material resistente e duradeiro. Ademais, descubrimos a gran variedade de obxectos que se poden crear a partir do coiro, valorando así o traballo artesanal e a súa importancia.
Como parte práctica da actividade, cada alumno e alumna tivo a oportunidade de elaborar a súa propia pulseira de coiro, decorándoa ao seu gusto con gran creatividade e entusiasmo. O resultado foi realmente fermoso: pezas únicas, cheas de personalidade, que puideron levar para a casa como recordo desta experiencia tan especial.
Queremos agradecer sinceramente a Fernando a súa visita e a súa xenerosidade por compartir o seu coñecemento connosco. Sen dúbida, foi unha actividade moi enriquecedora que deixou pegada en todo o alumnado.
