No CEIP López Ferreiro continuamos desenvolvendo as actividades programadas ao longo do mes de marzo, un tempo especialmente significativo para reflexionar sobre a igualdade, a coeducación e o papel das mulleres no mundo.
Nesta ocasión tivemos a sorte de recibir a visita de María Paz, representante da ONG Solidariedade Internacional, que compartiu co noso alumnado un fermoso conto cheo de viaxes, culturas e historias de vida. A través da narración, fomos percorrendo distintos lugares do planeta (México, Guatemala, a India ou Camerún) da man de nenas que viven neses países, coñecendo un pouco máis sobre as súas realidades, os seus soños e tamén os retos aos que se enfrontan no seu día a día.
A actividade converteuse nunha auténtica viaxe imaxinaria na que o alumnado puido descubrir outras culturas e comprender mellor a diversidade do mundo no que vivimos. O conto tamén nos falou de solidariedade, de cooperación e da importancia de construír sociedades máis xustas nas que todas as persoas teñan as mesmas oportunidades.
Como broche final desta experiencia tan enriquecedora, mesmo nos animamos a aprender e bailar unha danza tradicional guatemalteca. Foi un momento cheo de ledicia que nos permitiu achegarnos, tamén a través da música e do movemento, á cultura doutro país.
Este tipo de actividades contribúen a traballar na escola valores fundamentais como a empatía, o respecto, a solidariedade e a educación en igualdade. No CEIP López Ferreiro estamos firmemente comprometidos coa coeducación e coa sensibilización do noso alumnado para avanzar cara a unha sociedade máis xusta, baseada no respecto mutuo e na igualdade real entre homes e mulleres.
Seguimos aprendendo, reflexionando e medrando xuntos e xuntas ao longo deste Mes da Muller.
