Hoxe vivimos no noso centro unha xornada moi especial grazas á visita do alumnado e do profesorado do CEE Manuel López Navalón. A súa chegada trouxo consigo unha experiencia inesquecible: un espectacular obradoiro de cociña no que aprendemos, compartimos e, por suposto, gozamos moitísimo.
Da man destes rapaces e rapazas e do gran equipo profesional que os acompañaba, tivemos a oportunidade de preparar numerosos pratos deliciosos, creativos e cheos de sabor. Entre receitas, decoracións e presentacións sorprendentes, fomos descubrindo que a cociña é moito máis que elaborar alimentos: é un espazo de encontro, cooperación, aprendizaxe e motivación.
Esta actividade, enmarcada dentro do aprendizaxe-servizo, permitiunos aprender uns dos outros nun ambiente de respecto, colaboración e alegría. Queremos destacar especialmente a enorme amabilidade, paciencia e profesionalidade do persoal do CEE Manuel López Navalón, así como o bo facer, a implicación e o entusiasmo do seu alumnado, que nos deu unha auténtica lección de compañeirismo e superación.
Ao longo da mañá non só aprendemos receitas; tamén valores fundamentais. A capacidade de esforzarse, superar dificultades, traballar en equipo e axudar ás demais persoas quedou presente en cada elaboración, en cada sorriso e en cada pequeno detalle. Foi unha experiencia que nos recordou a importancia da solidariedade, da inclusión e de valorar todo o que cada persoa pode achegar.
Ademais de preparar e decorar os pratos con moita creatividade, tamén tivemos a sorte de degustalos, desfrutando de sabores espectaculares e de momentos moi especiais compartidos arredor da mesa.
Sen dúbida, foi unha actividade enriquecedora e emocionante. Grazas ao CPEE Manuel López Navalón por compartir connosco tanto saber, tanta ilusión e humanidade.
