Dentro das propostas de coeducación desenvolvidas no centro, “As mulleres das nosas vidas” converteuse nunha experiencia especialmente significativa para o alumnado e as familias.
A través desta actividade, invítase ás nenas e aos nenos a recuperar historias de mulleres do seu entorno próximo —nais, avoas, bisavoas, tías, veciñas…— poñendo en valor vidas, experiencias e pequenos actos cotiás que moitas veces pasan desapercibidos, pero que tamén constrúen memoria e comunidade.
A proposta nace da necesidade de ampliar os referentes femininos que habitualmente aparecen nos materiais escolares, afastándonos dunha visión centrada unicamente en grandes figuras históricas ou heroínas excepcionais. O que buscamos é visibilizar tamén o valor da vida diaria, dos coidados, do esforzo silencioso, da superación e do amor presente en tantas mulleres anónimas que forman parte da historia persoal e familiar do noso alumnado.
Porque non buscamos mulleres perfectas nin heroínas inalcanzables, senón recoñecer e agradecer todas esas pegadas de coidado, loita e dignidade que tantas mulleres deixaron —e seguen deixando— nas nosas vidas.
