Desde hai xa varios cursos, as aulas de Educación Infantil da nosa escola veñen desenvolvendo diferentes propostas de Aprendizaxe-Servizo que permiten conectar o que acontece dentro da aula coas necesidades, persoas e realidades da nosa contorna.
Moitas destas experiencias xorden arredor da tradición oral, da música, dos coidados e das relacións interxeracionais. A través delas, as nenas e nenos non só desenvolven competencias lingüísticas, sociais ou emocionais, senón que aprenden a escoitar, colaborar e sentirse parte activa dunha comunidade máis ampla.
Entre estas propostas destacan as estabelcidas con AGADEA (Asociación Galega de axuda aos enfermos con demencia Tipo Alzheimer) e coa Aula de Maiores da Biblioteca Ánxel Casal, coas que compartimos encontros, cantigas, sesións de musicoterapia e experiencias arredor da tradición oral e da memoria colectiva. Estas actividades permítennos crear espazos de encontro entre xeracións nos que o alumnado aprende desde a emoción, a vivencia e o vínculo coas persoas maiores.
Ao longo do tempo, estas experiencias fóronse consolidando, demostrando que a escola tamén pode ser un lugar desde o que construír comunidade, fortalecer redes de apoio mutuo e aprender a mirar o mundo con outros ollos.
