Ao longo deste curso, O Horto do Ferreiro converteuse tamén nun espazo para reflexionar sobre a alimentación saudable, a orixe dos alimentos e a importancia de adquirir hábitos de vida responsables desde a infancia.
En colaboración coas familias, desenvolvemos obradoiros de cociña, compartindo receitas, experiencias e momentos de aprendizaxe arredor da comida real. Ademais, contamos coa visita dunha experta en nutrición, que guiou ao alumnado nunha charla-obradoiro na que elaboramos unha deliciosa torrada saudable, descubrindo alternativas sinxelas, nutritivas e equilibradas para o día a día.
No propio horto seguimos observando, cultivando e coidando diferentes verduras e hortalizas como acelgas, cenorias, chícharos, brócoli, tomates, coliflor, escarola ou allo porro, comprendendo de primeira man os ciclos naturais e o valor dos alimentos que chegan á nosa mesa.
Esta aprendizaxe completouse cunha visita ao Mercado de Abastos de Santiago, onde puidemos valorar a importancia dos mercados de proximidade como espazos culturais, sostibles e conectados co medio natural, observando a gran diversidade de alimentos e identificando os diferentes postos de alimentación.
