Dentro da Semana de Actividades do 50 aniversario do CEIP López Ferreiro e coincidindo coa última semana do trimestre, levouse a cabo unha proposta moi especial: os Xogos Internivel, unha experiencia pensada para seguir construíndo comunidade, fortalecer vínculos e aprender a convivir desde o coidado mutuo.
A actividade consistiu en crear agrupamentos aula-aula entre alumnado de idades moi diferentes, favorecendo encontros que, na vida diaria do centro, non sempre se producen de maneira natural, xa que o alumnado de Educación Infantil e de Educación Primaria conta con patios diferenciados.
A través do xogo compartido, da conversa, da cooperación e da toma de decisións conxuntas, esta proposta permitiu que o alumnado se coñecese mellor, descubrindo que, máis alá da idade, todas e todos temos algo que ofrecer e algo que aprender dos demais.
Para o alumnado maior, a experiencia supuxo un importante exercicio de empatía, autorregulación e responsabilidade, tendo que escoitar, acompañar, ceder protagonismo, adaptar os seus impulsos e tomar decisións pensando tamén nas necesidades, intereses e ritmos das compañeiras e compañeiros máis pequenos.
Para o alumnado máis pequeno, foi unha oportunidade única para coñecer referentes novos dentro da escola, establecer vínculos afectivos con alumnado de cursos superiores e gañar seguridade ante o futuro paso aos espazos e dinámicas de Primaria (no caso do alumnado de Infantil).
Con propostas coma esta seguimos demostrando que, no López Ferreiro, aprender tamén significa coidar, acompañar, compartir e sentir que formamos parte dunha mesma comunidade.
