Desde que o noso centro forma parte do proxecto MUS-E, cada final de curso, a mestra coordinadora da proposta participa nunha xornada de encontro xunto co resto de coordinadoras e coordinadores dos centros de Galicia, o equipo artístico-pedagóxico e as persoas responsables do programa.
Este ano, a cita tivo lugar en A Coruña, nunha xornada de traballo, reflexión e intercambio que, máis alá da coordinación técnica, supuxo tamén un valioso espazo para tecer rede entre centros que comparten unha mesma mirada educativa. Ao longo do encontro puxéronse en común as experiencias desenvolvidas en cada escola, os logros acadados, as dificultades que van xurdindo no camiño, os retos presentes e futuros, así como posibles propostas de mellora que permitan seguir fortalecendo o proxecto.
Estes encontros, resultan fundamentais para avaliar, revisar e facer medrar unha iniciativa que emprega arte e ioga como ferramenta de inclusión, convivencia e transformación educativa.
