Dentro das actividades vinculadas ao noso proxecto Feira en Feira e ao programa de Igualdade, o alumnado participou nun interesante taller de olaría que nos permitiu achegarnos a un dos oficios tradicionais máis representativos da nosa cultura e, ao mesmo tempo, poñer en valor o papel das mulleres que contribuíron á súa conservación ao longo do tempo.
Durante o taller, o alumnado tivo a oportunidade de experimentar co barro, modelando as súas propias creacións e descubrindo as técnicas e procesos que forman parte deste antigo oficio.
Esta proposta serviunos para seguir avanzando no coñecemento do noso patrimonio cultural, conectando co espírito do proxecto “Feira en Feira”, a través do cal exploramos os oficios, costumes e saberes que forman parte da identidade da nosa terra.
Foi unha xornada chea de creatividade, aprendizaxe e respecto polas tradicións, na que o barro se converteu nunha ferramenta para descubrir, valorar e reivindicar a pegada das mulleres na nosa cultura.
