Con motivo da celebración do Día do Libro, no noso centro desenvolvemos unha serie de actividades que converteron a lectura na gran protagonista durante toda a semana.
Un dos momentos máis fermosos foi a visita das familias ás distintas escolas para compartir contos co alumnado. Foi unha oportunidade marabillosa para gozar e acompañar aos nosos nenos e nenas no descubrimento dos libros e da lectura.
Ao mesmo tempo, a biblioteca do centro transformouse nun espazo de experimentación, creatividade e aprendizaxe, a través de diferentes propostas relacionadas cos libros. O alumnado participou en actividades de deseño e creación, de robótica, de contos proxectados e obradoiros de manualidades inspirados en diferentes historias e personaxes literarios.
Estas actividades permitiron achegar a lectura desde diferentes linguaxes, favorecendo experiencias significativas e motivadoras para todo o alumnado.
Queremos agradecer a colaboración das familias que participaron nesta celebración e contribuíron a facer deste Día do Libro xornadas inesquecibles.
