Tivemos a sorte de recibir na biblioteca do centro a visita da protectora de animais do Morrazo, nunha actividade moi especial que encantou tanto ao alumnado como ás familias participantes.
Ao longo da tarde do martes, os nenos e nenas puideron coñecer de preto o traballo destes cans, aprender sobre os seus coidados, a comunicación cos animais e os beneficios que achegan en ámbitos educativos e emocionais. Ademais, realizáronse diferentes dinámicas participativas nas que o alumnado interactuou cos cans a través do xogo.
Ademais na escola de Vilarello, dentro do noso proxecto De feira en feira, estiveron traballando e investigando durante semanas sobre unha raza tan nosa como é a do can palleiro a través de distintas tarefas.
Queremos agradecer á asociación a súa visita, a cercanía e o cariño co que desenvolveron todas as actividades, facendo desta experiencia unha lembranza moi especial para toda a comunidade educativa.
