Con motivo da celebración do Día das Bibliotecas, hoxe na BiblioteCRA gozamos dunha actividade moi especial: unha divertida obra de teatro inventada e improvisada polas mestras Samai e Antía.
Ao longo da representación, as mestras foron creando a historia diante de todos e todas, contando ademais coa colaboración e participación dos nenos e nenas do CRA, que se converteron en auténticos protagonistas da función. Entre risas, sorpresas e moita imaxinación, fomos construíndo xuntos unha historia única que fixo da biblioteca un espazo cheo de creatividade e diversión.
A actividade rematou cunha fermosa mensaxe que nos fixo reflexionar:
“A todos se nos dá ben algo, aínda que ás veces teñamos que tropezar algunha vez para descubrilo.”
Deste xeito celebramos o Día das Bibliotecas, lembrando que a biblioteca é tamén un lugar para crear, compartir historias e aprender xuntos.
