Durante o mes de outubro tivo lugar a inauguración da biblioteca escolar cunha actividade moi especial: un concerto didáctico acompañado dunha presentación de instrumentos tradicionais. Esta proposta serviu para dar comezo á programación da biblioteca dentro do proxecto documental integrado (PDI) do centro, que este curso leva por título De feira en feira.
A actividade permitiu ao alumnado achegarse á música tradicional galega dun xeito participativo e dinámico. Ao longo do concerto, o músico foi presentando diferentes instrumentos tradicionais, explicando as súas características, o seu funcionamento e o papel que teñen dentro da nosa cultura musical. O alumnado puido coñecer de preto sons e instrumentos que forman parte do noso patrimonio cultural.
Iniciamos un curso cheo de propostas que nos permitirán seguir explorando o mundo das feiras desde diferentes ámbitos: a cultura, os oficios, a gastronomía ou a historia. A inauguración da biblioteca marcou o punto de partida dun proxecto que pretende achegar ao alumnado ás raíces da nosa cultura dun xeito creativo e significativo.
