Na BiblioteCRA vivimos unha xornada moi especial na que se mesturaron a lectura, a reflexión e a solidariedade.
Por un lado, recibimos a visita de Afundación, que trouxo ao noso centro un contacontos sobre a diversidade familiar. A través desta actividade, o alumnado puido coñecer diferentes tipos de familias e reflexionar sobre a importancia do respecto, da igualdade e do cariño que une ás persoas, independentemente de como sexa cada familia.
Ademais, como cada ano, celebramos a nosa tradicional Panxoliña Solidaria. Os nenos e nenas prepararon con moita ilusión unha panxoliña que saímos cantar polas rúas da vila. Durante o percorrido, os veciños e veciñas colaboraron entregándonos alimentos, que posteriormente se recollen para axudar ás persoas que máis o precisan nestas datas.
Esta actividade converteuse xa nunha tradición moi especial para o noso centro, na que o alumnado aprende o valor da solidariedade, da colaboración e do compromiso coa comunidade.
