Con motivo do 25 de novembro, día internacional para a eliminación da violencia contra as mulleres, no noso centro realizamos diferentes actividades de sensibilización en colaboración co Equipo de Convivencia, co obxectivo de fomentar entre o alumnado valores de respecto e igualdade.
Unha das accións máis significativas foi a creación nas escolas da instalación Zapatos Vermellos inspirada no proxecto da artista mexicana Elina Chauvet. Esta simboliza a ausencia das mulleres vítimas da violencia e convértese nunha poderosa forma de facer visible esta realidade. Os zapatos vermellos colocados nos distintos espazos das escolas e na contorna convidaron a toda a comunidade a reflexionar sobre a importancia de construír unha sociedade máis xusta e igualitaria.
Ademais, no noso Martes de conto tamén traballamos esta temática a través da lectura do álbum ilustrado Eu vou comigo, unha historia que nos fala da importancia de querernos tal e como somos e de non cambiar para gustar aos demais. A través deste conto reflexionamos co alumnado sobre a autoestima, a identidade e o respecto polas persoas.
Despois da lectura realizamos diferentes actividades, nas que os nenos e nenas puideron expresar as súas ideas e compartir reflexións.
Deste xeito, desde a BiblioteCRA e en colaboración co Equipo de Convivencia, continuamos traballando para que a escola sexa un espazo de igualdade, diálogo e convivencia, onde educamos tamén en valores fundamentais para construír un futuro mellor.
