Despois de coñecer os diferentes materiais de laboratorio, así como realizar as prácticas da atmosfera e da hidrosfera, tocou aprender un chisco sobre outra capa terrestre: A BIOSFERA. Pasamos de empregar o microscopio para ver diferentes células ( procariotas do iogur, as células eucariotas da nosa mucosa bucal e as dunha cebola), a ver …organismos PLURICELULARES. Nesta práctica adentrámonos no mundo dos animais, concretamente, nos invertebrados vendo a anatomía externa e interna dun molusco cefalópodo: a pota.
Un grupo de diferentes especies no que destacan órganos fascinantes como uns tentáculos con ventosas para cazar e reproducirse, 3 corazóns, unhas branquias para respirar, uns ollos moi desenvolvidos, unhas células epidérmicas que lle permiten camuflarse, unha bolsiña de tinta para desaparecer e un sifón para propulsarse coma un foguete submariño. E todo isto, está formado por células. As mesmas que vimos ao microscopio, pero que agora están organizadas en tecidos, órganos e sistemas funcionando como unha maquinaria perfecta.
A maxia da biosfera non deixa de sorprender, canto máis a coñeces… máis incrible che parece.
