Foron convocados os premios extraordinarios de ESO ao rendemento académico.
Están destinados ao alumnado que rematou 4º ESO no curso 2025-2026 cunha media da etapa en toda a ESO igual ou superior a 9.
O alumnado dos centros docentes de Galicia que cumpra eses requisitos pode presentarse á proba para a obtención do premio extraordinario (proba PEE), que ten unha dotación de 1.000 € para cada un/ha dos/as 20 mellores resultados na citada proba.
A proba terá lugar o día 23 de xuño e os lugares de realización publicaranse no portal educativo e na páxina de PremiosEdu (https://www.edu.xunta.gal/). A proba consta de cinco exercicios que versarán sobre: Lingua Galega e literatura, Lingua Castelá e literatura, Primeira lingua estranxeira cursada, Xeografía e Historia e Matemáticas A ou B (segundo a cursada polo/a alumno/a).
Para matricularse na proba o alumnado deberá presentar no instituto o Anexo I debidamente cuberto. O prazo de matrícula está aberto do 9 ao 15 de xuño, ambos inclusive. As listaxes provisionais de persoas admitidas e excluídas na proba publicaranse o día 16 de xuño no portal educativo e en PremiosEdu. O prazo de corrección de erros na matrícula será de 3 días hábiles, do 17 ao 19 de xuño. As listaxes definitivas de persoas admitidas e excluídas na proba publicaranse o día 22 de xuño no portal educativo e en PremiosEdu.
Aínda que non hai requisito de nota media mínima na ESO para matricularse na proba PEE, para a solicitude do premio extraordinario si hai o requisito de nota media mínima na ESO de 9 (sen contar a materia de Relixión). Polo tanto, é aconsellable que se matricule na proba só aquel alumnado que teña unha perspectivo realista de acadar esa nota media mínima.
Con posterioridade á realización da proba PEE, unha vez publicadas as cualificacións definitivas da mesma, o alumnado que cumpra os requisitos establecidos na orde da convocatoria poderá formalizar no prazo dun mes unha solicitude para optar á subvención do Premio extraordinario de ESO ao rendemento académico. As solicitudes ao premio presentaranse preferiblemente por medios electrónicos a través da aplicación PremiosEdu ou a través do formulario normalizado dispoñible na Sede electrónica (código do procedemento ED311D) (https://sede.xunta.gal/es/).
Toda a información sobre estes premios, así como modelos de exame de convocatorias anteriores, poden consultarse na páxina web PremiosEdu: https://www.edu.xunta.gal/premiosedu/
