Do 19 de maio ao 19 de xuño (ambos incluídos) está aberto o prazo para solicitar as axudas para a adquisición de material escolar para o curso 2026-2027. Ditas axudas concédense ao abeiro da Orde do 29 de abril de 2026 pola que se regula a participación no fondo solidario de libros de texto e se convocan axudas para adquirir libros de texto e material escolar destinadas ao alumnado matriculado en educación primaria, educación secundaria obrigatoria e educación especial en centros docentes sostidos con fondos públicos para o curso escolar 2026/27 (https://www.xunta.gal/dog/Publicados/2026/20260518/AnuncioG0761-290426-0003_gl.html).
No caso do noso instituto, ao ser un centro E-Dixgal, unicamente se poden solictar as axudas para material escolar. A solicitude farase preferiblemente por vía electrónica no formulario normalizado (Código do procedemento ED330B), dispoñible na aplicación Fondolibros (https://www.edu.xunta.gal/fondolibros/), a través da sede electrónica da Xunta de Galicia. Opcionalmente poderá facerse de xeito presencial no centro docente.
De acordo co modelo híbrido de E-Dixgal que comezou o curso pasado, as familias que resulten beneficiarias da axuda para a adquisición de material escolar automaticamente serán tamén beneficiarias do financiamento dun ou dous libros de texto das materias establecidas polo centro. Eses libros serán adquiridos desde o centro e se lle prestarán ao alumnado beneficiario ao comezo do curso que vén. Polo tanto, as familias beneficiarias non deberán mercar eses libros de texto (si o resto de libros que haxa no curso correspondente). A listaxe de libros de texto para o curso 2026/27 será publicada na web e no taboleiro do centro ao final do presente curso.
Datas importantes:
- Prazo de solicitude das axudas: do 19 de maio ao 19 de xuño.
- Publicación das listaxes provisionais: 13 de xullo.
- Prazo de presentación de reclamacións ás listaxes provisionais: 14, 15 e 16 de xullo.
- Publicación das listaxes definitivas: 27 de xullo.
