Benvidos ao novo sitio da escola pública de Baión!

O CEIP Plurilingüe de Sestelo-Baión foi inaugurado no ano 1990 e serviu para agrupar no lugar de Sestelo a todas as escolas dispersas pola parroquia de Baión. Nestes máis de 35 anos experimentou as transformacións que son comúns a todas as escolas semellantes. A aposta pola integración de todo o alumnado, a atención á diversidade, a incorporación das tecnoloxías da información e da comunicación, a dinamización da lingua galega e a promoción da biblioteca escolar foron algúns deses feitos que valen para describir os cambios ao longo de todas estas décadas.

A escola tamén se adaptou aos novos tempos aumentando servizos moi valiosos para as familias como o comedor escolar, o plan madruga e as actividades extraescolares en colaboración coa ANPA. Aspiramos a ser referencia cultural, educativa e social para a nosa contorna máis próxima. Sabemos que o papel que xoga unha escola pública como a nosa ten unha relevancia especial pois debe contribuír a paliar as carencias e necesita ser o eixo que impulse a vida da comunidade. Queremos ser un lugar de acollida para todo o alumnado, tomando conciencia da súa diversidade, pero tamén unha escola que acolla o profesorado e as familias co compromiso permanente de traballar a favor de obra, é dicir, de promover valores de convivencia, respecto e tolerancia.