Álbums

Vivimos unha xornada de Entroido chea de cor, música e moita diversión.
Comezamos coa celebración dun desfile de disfraces  este ano co tema de estilos musicais. Polo escenario pasaron artistas de rock, pop, música chenteira e country. 
Despois, tocou repoñer forzas cunha deliciosa merenda compartida. Comimos doces típicos de Entroido, elaborados polas familias, ás que lles agradecemos a súa colaboración e implicación. Orellas, filloas e outras lambetadas tradicionais non faltaron.
Para rematar a xornada, organizamos xogos musicais coas familias, nos que pequenos e maiores participaron con entusiasmo. Foi un momento fantástico para compartir, rir e seguir gozando da música en comunidade. 

(Pincha na imaxe para ver máis fotos)

O venres 30 de xaneiro celebramos no noso centro o Día da Paz, unha xornada moi especial dedicada a reflexionar sobre valores tan importantes como o respecto, a axuda, a solidariedade e a convivencia.

Ao longo de toda a semana, o alumnado preparou mensaxes cheas de significado sobre a importancia da paz, que foron colocadas nas escaleiras do colexio. Ademais, o alumnado do terceiro ciclo elaborou un manifesto no que expresaron o seu compromiso cun mundo máis xusto, empático e solidario.

A celebración culminou cun emotivo momento no que todo o centro cantou xunto unha canción pola paz. Como recordo desta xornada, cada nena e neno recibiu un imán para levar ás súas casas, co obxectivo de que a mensaxe da paz siga presente tamén fóra da escola.

Foi, sen dúbida, un día cheo de aprendizaxe, unión e esperanza.

(Pincha na imaxe para ver máis fotos)