semana do luns 19 de maio Isaac, o noso xefe de estudos, e Reme, a profe de música, realizaron unha mobilidade de observación no Lycée Leconte-de-Lisle. Trátase dun centro situado na Illa Reunion, un pequeno territorio francés no Océano Índico. Podes ver a localización deste liceo aquí.
Esta mobilidade está enmarcada na Acreaditación Erasmus+ do sector escolar e, entre outros obxectivos, pretende abrirnos portas para poder enviar alumnado a este centro en cursos posteriores e realizar actividades que nos axuden a acadar os obxectivos da nosa acreditación.
A continuación tedes a crónica que elaboraron Isaac e Reme para describir a súa experiencia:
Ao longo da nosa estadía formativa na Réunion, puidemos coñecer de primeira man a riqueza pedagóxica e humana dun liceo insular que aposta pola internacionalización e o desenvolvemento sostible. A seguir recóllense as principais tarefas realizadas, organizadas por eixos temáticos.
1. Estrutura xeral do centro
O liceo conta cunha estrutura moderna e funcional: pavilóns especializados (ciencias, artes, administración) distribúense arredor dun patio central cuberto de vexetación tropical. A dirección promove unha gobernanza participativa onde equipos docentes, servizos de “vie scolaire” e persoal administrativo colaboran en comisións semanais para mellorar a vida escolar e a calidade educativa.
2. Orixes do alumnado
A comunidade escolar evidencia a diversidade cultural propia da Illa Reunión: métises, criollos, familias de orixe malgaxe, india, francesa continental e comoriana conviven nas aulas. Este mosaico lingüístico e étnico reforza o enfoque intercultural do proxecto Erasmus, pois o alumnado comparte experiencias sobre identidade e inclusión.
3. Diversidade dos profesionais
O centro dispón dun cadro de persoal plural:
Equipo pedagóxico: docentes con perfís STEAM, humanidades, linguas e formación profesional.
Servizo de “vie scolaire”: asistentes educativos que xestionan acompañamento, disciplina positiva e actividades extraescolares.
Administración: secretaría académica, recursos humanos e intendencia coordinan bolsas, mobilidades, aprovisionamento e comunicación externa, neste caso administran procesos de toda a illa.
4. Educación para o Desenvolvemento Sostible (EDD)
A EDD é un eixo vertebrador do currículo. Visitamos:
O xardín agroecolóxico onde o alumnado aprende compostaxe, reciclaxe de auga e cultivo biolóxico.
O arboreto didáctico con especies endémicas que serven para estudar biodiversidade e elaborar fichas botánicas multilingües. Un proxecto consistiu na realización de placas cerámicas informativas das árbores do centro por parte do alumnado de artes.
Horta e colmeas escolares: proxecto transversal que axuda a reciclaxe e de productos orgánicos e a concienciación sobre a alimentación e mel para iniciativas solidarias, concurso na illa e exposicións na materia que se imparte en español.
5. Proxecto Endemic@s
Esta iniciativa interdisciplinar combina ciencias naturais, artes plásticas e TIC para concienciar sobre a conservación de especies propias da illa en estreita colaboración cun centro de Tacoronte (Tenerife). Creáronse podcasts, códigos QR ao pé das plantas e unha exposición interactiva que viaxará aos centros socios do consorcio Erasmus. Tamén se creou un xogo sobre as aves autóctonas que serve para ensinar ao alumnado de primaria cores, números e partes do corpo en español de maneira divertida.
6. Observación de prácticas docentes
Clases de Física: exposición sobre o número aureo e visita ao laboratorio.
Clases de Música: asistencia ao ensaio da coral, favorecendo a expresión intercultural.
Presentación da materia DNL (disciplinas non lingüísticas en inglés): demostración de proxectos CLIL en ciencias e historia.
Proxecto do Mel: a profesora de bioloxía integra química analítica, economía circular e mercadotecnia na produción apícola. Recentemente foron galardoados cun premio por este proxecto.
(https://www.lequotidien.re/article/environnement/2025/05/26/une-journee-placee-sous-le-signe-de-leducation-au-developpement-durable).
7. Visitas institucionais e culturais
Coral Rexional: ensaio musical polifónico francés-inglés.
Reunión con Monsieur Ziemer, na que se presentou o proxecto europeo do centro, centrado na educación ambiental e a cooperación internacional. O centro foi recoñecido cun premio europeo polo fomento do sentimento de pertenza a Europa, destacando o seu traballo por unha identidade europea compartida baseada na sustentabilidade e na diversidade.
Servizo “Scolaire”: coñecemos o sistema que rexistra ausencias de alumnado e profesorado, así como o réxime de sancións restaurativas, destacando a xestión externa e a inexistencia de profesorado titor.
Administración externa: entrevista co organismo que supervisa infraestrutura, en concreto co director (M. BERNE) e afianzamento dos vínculos intercentros.
8. Mobilidade individual
Realizáronse entrevistas con 5 alumnos e alumnas mediante o uso dunha rúbrica obxectiva e recomendouse ao liceo a escolla da alumna Maïssa, que será participante nunha estadía de longa duración no noso centro galego. Analizouse o impacto persoal e académico da mobilidade, recollendo boas prácticas para futuras acollidas.
Conclusión
Estas actividades reforzaron o noso compromiso coa innovación pedagóxica, a sustentabilidade e o diálogo intercultural. O intercambio en Illa Reunión serviu de laboratorio vivo onde aprendizaxe, biodiversidade e diversidade humana se integran nun mesmo proxecto europeo. Deseñamos xa novas liñas de colaboración para seguir sementando
pontes entre o Índico e o Atlántico.
