Guía para a diversificación de espazos educativos na ESO dende unha perspectiva inclusiva, igualitaria e interdisciplinaria

O profesorado, polo tanto, enfrontarase á pregunta de que sistema metodolóxico deberá aplica para que o seu alumnado poda desenvolver con éxito as competencias clave. Neste sentido, partindo das teorías e modelos, deberá adaptalos ás características e expectativas do seu alumnado e ao contexto no que se atope, acadando un equilibrio entre a presentación dos saberes, a autonomía de cada estudante e o traballo colaborativo.

É preciso, tamén, ter sempre presente o concepto de competencia, xa tratado anteriormente neste bloque. Como xa sinalou a OCDE no 2002, dito concepto fai referencia á capacidade de responder a demandas complexas e de levar a cabo tarefas diversas de forma adecuada. Supón unha combinación de habilidades prácticas, coñecementos, motivación, valores éticos, actitudes, emocións e outros compoñentes sociais e de comportamento que se mobilizan conxuntamente para lograr unha acción eficaz (OCDE, 2002).

Así, debemos entender que unha competencia considerarase adquirida cando o alumnado poña en marcha os mesmos recursos que necesitaría activar ao realizar unha actividade da vida real. E, polo tanto, conseguirase desenvolver unha competencia cando esta se poña en práctica. Sendo, así, de especial importancia o enfoque metodolóxico escollido.