Punto de partida da situación de aprendizaxe

• Para xerar a situación de aprendizaxe, traballarase sobre o documento base Esquema dunha situación de aprendizaxe: fases de xeito colaborativo no cartafol compartido en BoxAbalar.
• O grupo de traballo desenvolverá o reto do REA seguindo as fases secuenciais deste.
• Cando o grupo considere que as fases do reto están definidas (aínda que non estean completos os seus elementos: glosarios, actividades grupais e individuais, rúbricas...), pasaremos o REA a eXeLearning.
• A temporización aproximada para o desenvolvemento do REA en documento compartido é de entre dúas e catro semanas. Será o grupo de traballo quen valore cando pasar o documento compartido á ferramenta eXeLearning.

Consideracións a ter presentes

O título da SA debe ser motivador e estar contextualizado ao reto proposto.

No proxecto cREAgal, cada unha das fases das situacións de aprendizaxe irán numeradas do 1 ao 5 e cun título atractivo relacionado co contido da fase.

Ademais:

• Só se numerarán as fases da situación de aprendizaxe e os primeiros subniveis dependentes destas (ex. 1.1, 1.2, 1.3 /non 1.1.1, 1.1.2). Non se estenderán máis aló de dous subniveis por cada apartado. Os subniveis das fases levarán títulos motivadores e que esperten o interese.
• Ao comezo de cada páxina, de ser preciso, incluirase un glosario dos termos usados na mesma como axuda á comprensión do alumnado. A explicación dos termos do glosario debe orientarse como exemplo de uso no contexto que foi empregado no REA, non limitándose a un exemplo do concepto en abstracto.
• Cada fase levará actividades individuais e grupais para reforzar a aprendizaxe.
• Nas fases da situación de aprendizaxe estará presente o diario de aprendizaxe, un portfolio individual que cubrirá o alumnado e no que tamén se inclúen reflexións grupais.
• A temporización das fases non ten porque ser proporcional á duración total: deste xeito, algunha ou algunhas das fases poden ter unha duración, en sesións, superior ás demais.

Nomenclatura e traballo colaborativo

• Indicarase no nome do ficheiro -coa codificación recollida no apartado 3.3 da Guía técnica- a materia, o curso, a versión do REA (01, en principio), a súa numeración (con dous díxitos) no contexto global da materia, a data de edición en formato ano_mes_día.
  • Exemplo: TED_1ESO_REA_04_V01_20240206, indica que corresponde ao 4º REA do alumnado da materia Tecnoloxía e Dixitalización de 1º ESO, que se traballa a fase 1, e que foi actualizado o 6 de febreiro de 2024. Se hai dous ou mais cambios nun día indicaranse cun guión baixo e un número ao final (TED_1ESO_REA_04_V01_FASE 1_20240206_1, TED_1ESO_REA_04_V01_FASE 1_20240206_2...).

É importante a participación activa de todas as persoas do grupo en todas as fases da SA nesta primeira aproximación, de forma que o bosquexo principal da SA sexa unha obra colaborativa. En posteriores fases do traballo poderemos repartir tarefas que terán un fío condutor común neste documento da SA deseñada.