Section outline
-
O equipo do Gabinete Didáctico do Museo de Pontevedra daralles a benvida da man dunha das súas responsables, Paula Tilve Otero, quen presentará a grandes trazos o traballo que realizan desde o museo dentro da educación non formal. A medida que iremos visitando as diferentes coleccións dispostas nos edificios Sexto e Sarmiento do museo, iremos descubrindo a metodoloxía de traballo de cada unha das actividades e percorridos deseñados para o alumnado de educación primaria, secundaria e bacharelato: desenvolvemento da idea, deseño, procedemento, avaliación … Isto inclúe mostrar o material didáctico do que dispón o museo, a aula taller e todos os recursos pedagóxicos que poden ser de utilidade para as e os mestres e o profesorado. A nosa intención é que se estableza un diálogo entre os educadores do museo e o grupo de docentes, de forma que aprendamos todos e todas uns dos outros, de aí que deixemos unha marxe de tempo para o coloquio, o debate e a resolución das posibles dúbidas que xurdan.
Algunhas das seccións do museo que imos visitar desde esta perspectiva da museografía didáctica son: a prehistoria e a historia antiga, arte galega do gótico á contemporaneidade (neste momento os fondos prerrománicos e románicos non están expostos), Castelao, Sala de Manuel Quiroga, arte doutras rexións de España - en diálogo coa arte galega (do gótico ao século XX)- e Sargadelos.