2.5. Como traballar con grupos

Neste apartado veremos algunhas posibilidades que nos ofrece Moodle para traballar nun mesmo curso con varios grupos de alumnos e alumnas. Isto consiste tanto en deseñar algunhas actividades para que os/as participantes traballen en común (modo de Grupo) como en configurar algunhas actividades ou recursos para que estean só dispoñibles para un conxunto de alumnos e alumnas.

Para que serven os grupos? 

Esta opción permite ao/á profesor/a organizar a participantes en grupos dentro do propio curso ou en determinadas actividades. As actividades que teñen os grupos habilitados permiten ao profesor filtrar as contribucións dos alumnos por grupo, permitindo consultar a participación ou entregas de cada grupo por separado.

Moodle proporciona tres modos de grupo posibles:

• Sen grupos
  Ningún participante do curso pertence a ningún grupo. Os grupos non están en uso.
• Grupos separados
  Cada grupo só pode ver e acceder ao seu propio traballo. Os membros de cada grupo non poden ver nin acceder ao traballo do resto dos grupos.
• Grupos visíbeis
  Cada grupo realiza o seu propio traballo, aínda que se lles permite observar o traballo do resto dos grupos.

Os grupos poden ser definidos a dous niveis:

1. Grupos a nivel de curso
2. Grupos a nivel de actividade

Para definir grupos a nivel de curso, debemos editar a configuración do curso no seguinte menú Bloque Administración -> Administración do curso -> Editar os axustes.

Imaxe 2.5.1 Editar a configuración dos grupos do curso

No formulario que aparece despois de premer este menú, debemos premer no apartado Grupos que aparece nas opcións despregables que se mostran na parte inferior da pantalla e configurar as opcións dispoñibles.

• Modo de grupo
  Permite configurar se no curso imos traballar Sen grupos, con Grupos separados ou con Grupos visíbeis.
• Forzar o modo de grupo
  Se forzamos o modo de grupo (opción SI), este modo de grupo aplicarase a tódalas actividades do curso e neste caso non se teñen en conta os axustes específicos de cada actividade para o modo de grupo.
• Agrupamento predeterminado
  No caso de existir agrupamentos xa configurados (un agrupamento é un grupo de grupos), permite seleccionar cal será o agrupamento por defecto no que se enmarcarán os novos grupos.

Como se crean os grupos? 

Para crear un novo grupo será necesario ir ao seguinte menú Bloque Administración -> Administración do curso -> Usuarios -> Grupos.

Imaxe 2.5.2 Pantalla creación de grupos

Cando se preme o botón Crear grupo móstrase un formulario no que poderemos cubrir os seguintes campos:

• Nome do grupo: indicar un nome que identificará a este grupo.
• Número ID do grupo: o número de identificación ID dun grupo (só se emprega cando se compara o grupo contra un sistema externo e non se presenta en ningún lugar do sitio). Este campo pode deixarse en branco.
• Descrición do grupo: opcionalmente podemos escribir unha pequena descrición para definir as características deste grupo.
• Chave de matriculación: unha chave de matriculación permite que o acceso ao curso estea limitado só a aquelas persoas que coñecen a chave. De especificarse unha chave de matriculación de grupo, entón dita chave non só permitirá aos usuarios acceder ao curso, senón que os fará membros do grupo.
• Mensaxería en grupo: Se está activado, os membros do grupo poden enviar mensaxes aos demáis do seu grupo a través do caixón de mensaxería.
• Nova imaxe: espazo para engadir ou modificar a imaxe correspondente ao grupo, que deberá sen en formato JPG ou PNG. Esta será recortada polo sistema e axustada a un cadrado de 100x100 pixels.

Despois de crear o grupo, asignaremos alumnos/as ao mesmo da seguinte maneira:

1. En primeiro lugar prememos sobre o nome do grupo que se mostrará no recadro da esquerda, para seleccionalo (imaxe 2.5.2).
2. A continuación, prememos sobre o botón Engadir/retirar usuarios que aparece debaixo do recadro da dereita (imaxe 2.5.2).
   
   

   Imaxe 2.5.3 Engadir/retirar usuarios

3. Seleccionamos os/as alumnos/as que van formar parte do grupo (imaxe 2.5.3). Podemos seleccionar varios/as alumnos/as ao mesmo tempo usando o método tecla Ctrl + clic co rato.
4. Finalmente prememos o botón Engadir que aparece na parte central.

Crear grupos automaticamente 

Opcionalmente tamén podemos crear grupos de forma automática premendo o botón Crear grupos automáticamente (imaxe 2.5.2).

Con esta opción, debemos seleccionar as seguintes opcións:

• Esquema de nomeamento
  O símbolo arroba (@) pode empregarse para crear grupos con nomes que conteñen letras. Por exemplo, Grupo @ pode xerar grupos denominados Grupo A, Grupo B, Grupo C...
  O símbolo grade ou grella (#) pode empregarse para crear grupos con nomes que conteñen números. Por exemplo, Grupo # pode xerar grupos denominados Grupo 1, Grupo 2, Grupo 3...
• Número de grupos/membros
  Cando está seleccionado número de grupos no apartado Especificar, neste campo debemos introducir o número de grupos que desexamos crear.
• Seleccionar membros segundo o rol
  Se desexamos que os grupos estean integrados por alumnos, neste apartado seleccionaremos o rol Alumnos.
• Asignar membros
  Neste campo indicaremos cal debe ser o criterio para distribuír os alumnos nos grupos: Ao chou, Alfabeticamente por nome e apelido, Alfabeticamente por apelido e nome, Alfabeticamente por número de ID.

Unha vez configurados estes parámetros podemos comprobar como quedarían conformados os grupos premendo en Vista Previa. Para finalizar o proceso, prememos o botón Envío que aparecerá no fondo da páxina. Ao premer este botón crearanse de forma automática os grupos indicados e asignaranse tódolos alumnos dispoñibles, distribuídos nos grupos seguindo o criterio seleccionado para a súa asignación a cada grupo.

Imaxe 2.5.4 Crear grupos automaticamente