Material escolar | CEE Nosa Señora do Rosario

A relación de material didáctico e complementario para cada curso académico será proporcionado pola titora ou titor de cada grupo, unha vez realizada a avaliación inicial do alumnado.

O alumnado que curse as etapas de Educación Primaria e Educación Secundaria Obrigatoria ten acceso ao fondo solidario de libros de texto. Ser beneficiario destas axudas para adquirir material escolar será compatible con calquera outra axuda para a mesma finalidade doutras entidades públicas ou privadas.

O alumnado de programas formativos de FP básica non está contemplado na convocatoria de FondoLibros pero dispón das Bolsas xerais para estudos non universitarios .

Poderán presentar solicitudes de participación do fondo solidario de libros de texto e axudas para adquirir libros de texto e material escolar os pais, nais, titores ou representantes legais do alumnado. A solicitude será única para todos os fillos e fillas e, de ser o caso, tutelados e tuteladas, que estean admitidos no mesmo centro docente. Cando o alumnado, no momento de presentar a solicitude, aínda non estea admitido en ningún centro docente para o seguinte curso, deberá presentala no centro en que estea matriculado.

As solicitudes presentaranse preferentemente por vía electrónica, mediante formulario normalizado (ED330B) dispoñible na aplicación informática (https://www.edu.xunta.gal/fondolibros/), a través da sede electrónica da Xunta de Galicia (https://sede.xunta.gal).

Opcionalmente, poderanse presentar as solicitudes presencialmente nos centros docentes ou en calquera dos lugares e rexistros establecidos na normativa reguladora do procedemento administrativo común.

O procedemento administrativo ED330B comprende, entre outras:

a) A convocatoria de axudas para adquirir libros de texto, material didáctico e complementario, destinadas ao alumnado matriculado en educación especial: a contía das axudas será de 300 €, con independencia da renda per cápita da unidade familiar.

b) A convocatoria de axudas para adquirir material escolar destinado ao alumnado matriculado en educación especial: a contía das axudas será de 75 €, con independencia da renda per cápita da unidade familiar.

Obrigas das persoas beneficiarias:

O alumnado de educación especial devolverá os libros e material reutilizable adquirido coas axudas, a falta de devolución será causa de exclusión da participación no fondo solidario e das axudas no curso seguinte.
Conservar en bo estado o material reutilizable adquidio coas axudas e devolvelo ao rematar o curso escolar.
Destinar o vale, única e exclusivamente, a adquirir o material que teña establecido o centro para o alumnado beneficiario.
Respectar as obrigas establecidas no artigo 11 da Lei 9/2007, do 13 de xuño, de subvencións de Galicia.

Mapa do sitio - Contacto co centro - Accesibilidade - Aviso Legal

CEE Nosa Señora do Rosario